Ձեր վստահելի աղբյուրը

«ՀՀ 2018թ. պետական բյուջեի մասին» ՀՀ օրենքի նախագծում նախատեսված ծախսերի մասով ֆինանսական ցուցանիշներն այսօր խորհրդարանում ներկայացնելով, ֆինանսների նախարարի առաջին տեղակալ Ատոմ Ջանջուղազյանը հայտնեց, որ Տնտեսական զարգացման և ներդրումների նախարարությունից 2018 թվականին սպասվում է բյուջետային 16 ծրագրի իրականացում։

«Ընդհանուր առմամբ, միջոցները, որոնք նախատեսվել են նախարարության համար, շուրջ 3 մլրդ 22 մլն դրամ է, այստեղ որոշակի աճ կա 2017 թվականի համեմատ՝ 430 մլն դրամի չափով։ Հիմնական տեսակարար կշիռ ունեցող մասը ծախսերի ծրագրի մեջ պետական ապարատի պահպանումն է»,- ասաց հիմնական զեկուցողը։

Ըստ նրա, 2018 թվականի բյուջեով Էներգետիկ ենթակառուցվածքների և բնական պաշարների նախարարությանը նախատեսվել է մոտավոր 87,1 մլրդ դրամի հատկացում։

Ջանջուղազյանը հատկանշական համարեց, որ այս ոլորտում հիմնական ծրագրերը ֆինանսավորվել են արտաքին աղբյուրներից։ Ընդամենը 3 ծրագիր է, որոնք իրականացվում են ներքին ռեսուրսների հաշվին։

«Տրանսպորտի, կապի և տեղեկատվական տեխնոլոգիաների նախարարության համար 2018-ի բյուջեի նախագծում նախատեսված է շուրջ 52, 6 մլրդ դրամի միջոցների օգտագործում, այս նույնպես էական կշիռ ունի ընդհանուր ծախսերի մեջ։ Ներքին ռեսուրսների հաշվին նախատեսվում է 17 մլրդ դրամ։ Հիմնական միջոցները տրամադրվելու են տրանսպորտի և ճանապարհների ծախսերի համար»,- ասաց փոխնախարարը:

Ինչ վերաբերում է Հանրային ծառայությունները կարգավորող հանձնաժողովին, նշեց, որ այս մարմինը այլ ծրագրեր չի իրականացնում, ըստ էության, միայն պետական մարմնի պահպանության ծրագիրն է նախատեսված. «Բյուջեն կազմված է օրենսդրության պահանջներին համապատասխան։ Օրենսդրությունը նախատեսում է, որ կհաշվարկվի աշխատավարձը, որի համար հիմք է հանդիսանում պետական պաշտոններ զբաղեցնող անձանց վարձատրության մասին օրենքը։

Նրա խոսքով՝ ՏՄՊՊՀ-ի դեպքում նույնպես օրենսդրությանը համապատասխան հաշվարկվել է  և 2018-ի բյուջեի նախագծում ներառվել է այն ֆինանսական ցուցանիշները, որը ենթադրում է,  որ կապահովի հանձնաժողովի հնարավոր լիարժեք գործունեությունը։ Ընդամենը 313,3  մլն դրամ է նախատեսվել հանձնաժողովի ծախսերի համար։

«Կադաստրի պետական կոմիտեին կտրամադրվի 3.7 մլրդ դրամ, որը հիմնականում կծախսվի աշխատավարձերի վրա: Քաղաքաշինության պետական կոմիտեի համար բյուջեի նախագծով նախատեսվել է 3,8 մլրդ դրամ, այստեղ բոլորը ներքին ռեսուրսների հաշվին իրականացվող ծրագրեր են։ Ջրային տնտեսությունների պետական կոմիտեի համար նախատեսված միջոցներն են՝ 34,4  մլրդ դրամ, այս դեպքում նույնպես զգալի է արտաքին միջոցներով իրականացվող միջոցառումների ծավալը»,- եզրափակեց Ատոմ Ջանջուղազյանը։