Ձեր վստահելի աղբյուրը

ՀՀ նախագահ Սերժ Սարգսյանը հարցազրույց է տվել «Россия 24» հեռուստաալիքին։ Նա անդրադարձել է մի շարք հարցերի, այդ թվում ՀՀ զինված ուժերի սպառազինության թարմացման տեմպերին, հայ-ռուսական տարբեր ձևաչափերով համագործակցությանը:

Ռուսաստանից նոր տիպի սպառազինություն ձեռք բերելու համար 100 միլիոն վարկ ստանալու և ռազմական համագործակցության մասին նախագահ Սարգսյանը նշել է, որ ՀՀ զինված ուժերը վատ հանդերձված չեն և իրենց տրամադրության տակ ունեն ժամանակակից լուրջ սպառազինություն և բարձր որակավորում անցած սպայական անձնակազմ:

«Բայց սա չի նշանակում, որ մեր զինված ուժերը չպետք է զարգանան թե՛ զորքերի կառավարման և թե՛ սպառազինության արդիականացման տեսանկյունից: Հենց արդիականացման համար էլ մենք խնդրել ենք ռուսական կողմին վարկ տրամադրել՝ նոր տիպի սպառազինություն ձեռք բերելու համար: Մենք ոչ մեկի չենք սպառնում, այլ ապահովում ենք մեր երկրի անվտանգությունը: Եվ ՀՀ զինված ուժերը Հայաստանի անվտանգության առաջին երաշխավորն են»,- նշել է երկրի ղեկավարը:

Սերժ Սարգսյանի խոսքով, ժամանակակից աշխարհում ոչ մի երկիր ի զորու չէ միայնակ և ամբողջովին ապահովել իր ազգային կամ ընդհանրապես անվտանգությունը, այդ իսկ պատճառով պետությունները անդամակցում են ռազմական դաշինքներին:

«Մենք անդամակցում ենք ՀԱՊԿ-ին ստեղծման իսկ օրվանից և բնականաբար, դաշինքի շրջանակներում մշակում ենք կոլեկտիվ պաշտպանության հարցեր: Դրանք դրսևորվում են տարբեր ձևերով ինչպես նաև զորավարժություններով: Այս տարի Հայաստանում անցկացվեցին «Մարտական եղբայրություն 2017» օպերատիվ-ռազմավարական մեծ զորավարժությունների մի մասը, որը մեր մոտ կրում էր  «Համագործակցություն 2017» խորագիրը: Զորավարժություններին մասնակցել են ՀԱՊԿ բոլոր երկրները մոտ 2500 ռազմական անձնակազմով, 500 ռազմական տեխնիկայով և մոտ 23 թռչող սարքերով: Որոնք հաջող կերպով ընթացան և մեկ անգամ ևս ապացուցեցին որ իրականում այն աշխատանքը, որ մենք կատարում ենք արդյունավետ է, մեր երկրների անվտանգության ապահովման համար»,- ասել է նախագահ Սերժ Սարգսյանը: