Ձեր վստահելի աղբյուրը

«Աջ ղեկով մեքենաների շահագործման հնարավոր արգելքի վերաբերյալ Ճանապարհային ոստիկանությունն առաջարկություններ չի ներկայացրել։ Հարցի վերաբերյալ ոստիկանությունում քննարկումներ չեն արվել»: Panorama.am-ի  գրավոր հարցմանն ի պատասխան հայտնեցին ոստիկանությունից:

Նախորդ տարիներին աջ ղեկով մեքենաների մասնակցությամբ պատահարների վերաբերյալ վիճակագրություն չկա:  Այս տարվա ինը ամիսների ընթացքում  Հայաստանում հաշվառվել է 2553 ճանապարհատրանսպորտային պատահար, որոնց հետևանքով զոհվել է 200, մարմնական վնասվածքներ ստացել՝ 3784 մարդ: Աջ ղեկով մեքենաների մասնակցությամբ տեղի է ունեցել 242 ճանապարհատրանսպորտային պատահար, որոնց հետևանքով զոհվել է 9, մարմնական վնասվածքներ ստացել՝ 369 մարդ: Աջ ղեկով տաքսիների մասնակցությամբ ճանապարհատրանսպորտային պատահարների հաշվառում չի իրականացվել:

Ընդհանուր առմամբ այս տարվա 9 ամիսների ընթացքում տաքսիների մասնակցությամբ  գրանցվել է ճանապարհատրանսպորտային  63 պատահար, ինչի հետևանքով զոհվել է երկու մարդ, վնասվածքներ ստացել 107-ը:

Նախորդ տարիներին աջ ղեկով ավտոմոբիլների մասնակցությամբ ճանապարհատրանսպորտային պատահարների  հաշվառում չի իրականացվել, իսկ ընդհանուր առմամբ  2012-2016-ին պատահարների թիվն ավելացել է 600-ով:

Ոչ ոստիկանությունից, ոչ էլ Պետական եկամուտների կոմիտեից հնարավոր չեղավ տվյալներ ստանալ, թե հանրապետությունում աջ ղեկով քանի մեքենա կա:

«Համաձայն ՀՀ ոստիկանության պետի 2016 թվականի 1-Նգ հրամանի Հայաստանի Հանրապետությունում հաշվառված և փաստացի առկա տրանսպորտային միջոցների մասին տեղեկությունը գաղտնագրված է, հետևաբար չի կարող տրամադրվել»,-հիմնավորեցին ոստիկանությունից:

Հարցին, թե Հայաստան ներմուծվող մեքենաներից քանիսն են աջ ղեկով, ՊԵԿ-ից պատասխանեցին հայցվող տեղեկատվության տրամադրումն անհնար է.  «Մաքսային սահմանով տեղափոխվող ապրանքների դասակարգումը կատարվում է ապրանքներն արտաքին տնտեսական գործունեության ապրանքային անվանացանկով (ԵԱՏՄ ԱՏԳ ԱԱ) նախատեսված (դասակարգված) խմբին վերագրելու միջոցով: ԱՏԳ ԱԱ 8703 ապրանքային դիրքում (թեթև մարդատար ավտոմոբիլներ և շարժիչային այլ տրանսպորտային միջոցներ՝ բացառապես նախատեսված մարդկանց փոխադրելու համար) առանձնացված չէ  աջակողմյա և ձախակողմյա ղեկով տրանսպորտային միջոցներ, այլ ներկայացված են ըստ շարժիչի աշխատանքային ծավալի, նոր կամ շահագործված լինելու տեսքով»:

Ոստիկանությունից միայն հայտնեցին, որ 2012 թվականից մինչև 2017 թվականի հոկտեմբերի 16-ը տրվել է 1881 աջ ղեկային կառավարման համակարգով տրանսպորտային միջոցի ձախակողմյան վերասարքավորման թույլտվություն:

Վերջին հինգ տարիներին գրանցված ճանապարհատրանսպորտային պատահարների ու դրանց հետևանքով զոհերի թվի վերաբերյալ  մանրամասն վիճակագրությունը՝ աղյուսակում: