Ձեր վստահելի աղբյուրը

Վերջին 11 տարում սպանվել է ավելի քան 900 լրագրող: ՄԱԿ-ի պաշտոնական կայքի համաձայն, 10-ը դեպքից 9-ում հանցագործները խուսափել են պատժից: Անպատժելիությունը մարդու իրավունքների խախտում է, նպաստում է լրագրողների նկատմամբ բռնություններին, պահանջում է համապատասխան գործողությունների կատարում:

2013 թվականին ՄԱԿ-ի գլխավոր ասամբլեան ընդունել է 68/163 բանաձևը, որում կոչ է արել նոյեմբերի 2-ը հռչակել լրագրողների դեմ հանցագործությունների անպատժելիության դադարեցման օր: Բանաձևը կոչ է անում անդամ-պետություններին կոնկրետ միջոցներ ձեռնարկել անպատժելիության դեմ պայքարում:

Օրն ընտրվել է ի հիշատակ ֆրանսիացի երկու լրագրողի, որոնք սպանվել էին Մալիում 2013 թվականի նոյեմբերի 2-ին: Բանաձևում դատապարտվում է լրագրողների և ԶԼՄ-ների աշխատակիցների նկատմամբ ցանկացած հարձակում և բռնարարք: Բացի այդ, փաստաթուղթը կոչ է անում անդամ-պետություններին անել իրենցից կախված ամեն ինչ լրագրողների նկատմամբ բռնությունը կանխելու համար, ապահովել լրագրողների դեմ հանցանք կատարած անձանց դատական պատասխանատվության ենթարկելը և տուժողների համար իրավական պաշտպանության պատշաճ միջոցների մատչելիությունը:

Բանաձևը նաև կոչ է անում պետություններին աջակցել անվտանգ ու բարենպաստ պայմանների ստեղծմանը, որպեսզի լրագրողները կատարեն իրենց աշխատանքը անկախ ու առանց ավելորդ միջամտության: