Ձեր վստահելի աղբյուրը

Թուրքական իշխանությունների ժխտողական քաղաքականության, պատմական իրողությունները նենգափոխելու և գլխիվայր շրջելու փորձերի պայմաններում բացառվում է որևէ տեսակի երկխոսություն Թուրքիայի իշխանությունների հետ Հայոց ցեղասպանության հարցի վերաբերյալ: Հայտարարել է Սիրայում Հայաստանի դեսպան Արշակ Փոլադյանը։

Նա մասնակցում էր Դամասկոսի ալ-Քինդի կինոթատրոնում Սիրիայի «Ահֆադ Աշտար» հիմնադրամի կազմակերպած «Խոստում» գեղարվեստական ֆիլմի բաց ցուցադրությանը։

ԱԳՆ մամուլի և տեղեկատվության վարչության փոխանցմամբ, դեսպանը ներկաների ուշադրությունը հրավիրել է ներկայիս Թուրքիայի հակահայկական դիրքորոշմանը և ժխտողական քաղաքականությանը՝ նշելով, որ հակառակ թուրքական սադրանքների, այնուամենայնիվ, Հայրենիք-Սփյուռք համագործակցության արդյունքում վերջին տասնամյակներին Հայոց ցեղասպանության միջազգային ճանաչումը մտել է նոր փուլ:

Ֆիլմի ցուցադրությունից հետո տեղի է ունեցել քննարկում, որին մասնակցել են Սիրիայում ՀՀ դեսպան Արշակ Փոլադյանը, Սիրիայի խորհրդարանի Սիրիա-Հայաստան բարեկամության խմբի նախագահ Նորա Արիսյանը և սիրիացի անվանի ռեժիսյոր Բասել ալ-Խատիբը:

Քննարկմանն ընդգծվել է, որ պատմական իրողությունները ներկայացնող «Խոստում»  ֆիլմը, ընդհանուր առմամբ, հաջողված աշխատանք է և, հիրավի, հանդիսանում է Հայոց ցեղասպանության մասին պատմող վերջին տարիներին նկարահանված լավագույն կինոնկարներից մեկը:

Միաժամանակ, բարձր գնահատական է տրվել ֆիլմի գաղափարաթեմատիկ բովանդակությանն ու գեղարվեստական արժանիքներին: