Ձեր վստահելի աղբյուրը

ՊՊԾ գնդի գրավման գործով 11 անդամի դատավարությանը՝ դատավոր Արտուշ Գաբրիելյանի նախագահությամբ,  ամբաստանյալներից Կարո Եղնուկյանը և նրա փաստաբան Տիգրան Հայրապետյանը բացարկի միջնորդություն ներկայացրեց մեղադրող դատախազ Պետրոս Պետրոսյանին: Նրանք նշեցին, որ նախաքննության ժամանակ Պ. Պետրոսյանը լուրջ բացթողումներ է կատարել, գործում կարևոր հանգամանքներ չեն ներառվել:

«Ազատություն» ռադիոկայանի հաղորդմամբ, Կ. Եղնուկյանը նաև հայտարարել է, որ բարձր ճնշում ունի։ Վկայակոչելով բժշկին՝ ասել, որ դատերն իրեն հակացուցված են։ Նա  հայտարարել է, որ լքում է նիստերի դահլիճը, այդ պահին նրա ինքնազգացողությունը վատացել է, նրան դատարանի դահլիճից տեղափոխել են հիվանդանոց։

Այնուհետև դատավորը հեռացել է խորհրդակցական սենյակ՝ բացարկի միջնորդությունը քննելու։

Դատարանը մերժեց Եղնուկյանի և նրա պաշտպանի ներկայացված միջնորդությունը:

Կարո Եղնուկյանին մեղադրանք է առաջադրվել այն բանի համար, որ նա կազմակերպված խմբի կազմում ընդգրկված անձանց կողմից 2016թ. հուլսի 17-ին ժամը 05։30-ի սահմաններում, զենքի օգտագործմամբ, կյանքի և առողջության համար վտանգավոր բռնություն գործադրելով ՀՀ ոստիկանության Երևան քաղաքի վարչության պարեկապահակետային ծառայության գնդի տարածքում գտնվող շենքերը, շինությունները և տրանսպորտի միջոցները, ինչպես նաև ՀՀ ոստիկանության աշխատակիցներ հանդիսացող անձանց պատանդ վերցնելուց և զավթաց վարչական շենքերը, շինությունները, տրանսպորտի միջոցներն ու պատանդներին ազատելու պայմանով պետությանը բարձրաստիճան պաշտոնատար անձանց հրաժարականի, ինչպես նաև ապօրինի զենք պահելու մեադրանքով կալանավորված Ժիրայր Սեֆիլյանին և մի շարք այլ անձանց ՀՀ ԱՆ Քրեակատարողական հիմնարկներից ազատ արձակելու վերաբերյալ պահանջներ ներկայացնելուց հետո՝ մինչև նշված պահանջների իրականացումը տեղեկություններ, խորհուրդներ տրամադրելով և խոչընդոտներ վերացնելով օժանդակել է կազմակերպված խմբի կողմից ՀՀ ոստիկանության պարեկապահակետային ծառայության գնդի տարածքում շենքերը, շինությունները և տրանսպորտի միջոցները և պատանդներին պահելուն։