Ձեր վստահելի աղբյուրը

«Նախագծի փոփոխություն չի իրականացվում, աշխատում ենք օրենքի նախագծի վրա, որպեսզի էլ ավելի բարելավենք, և բոլոր այն խնդիրները, որ կան մեր հասարակության մեջ և առաջանում են ընտանիքներում, կարողանանք կարգավորել, որպեսզի ընտանիքի բոլոր անդամների իրավունքները պաշտպանված լինեն»,- այս մասին այսօր լրագրողների հետ ճեպազրույցում ասաց Ազգային Ժողովի նախագահ Արա Բաբլոյանը՝ պատասխանելով հարցին, թե «Ընտանեկան բռնության կանխարգելման» օրինագծում ինչու՞ առաջացավ փոփոխությունների անհրաժեշտություն։

Լրագրողների հարցին, թե կարո՞ղ եք հավաստիացնել, որ օրենքը կընդունվի, ԱԺ նախագահը պատասխանեց. «Այո, ես վստահ եմ, որ մենք կընդունենք լավ օրենք»։

Մարդու իրավունքների պաշտպան Արման Թաթոյանն էլ նշեց, որ իրենք աշխատում են բոլոր կողմերի հետ մանրակրկիտ՝ այդ թվում նաև արդարադատության նախարարության հետ. «Հիմա էլ այդ ուղղությամբ աշխատանքներ են տարվում, քննարկման փուլ է»։

Հարցին, թե փոփոխությունների անհրաժեշտություն կա՞, նա պատասխանեց. «Որոշակի դրույթներ, այո, կար, բայց հիմա մենք աշխատում ենք դրանց վրա»։