Ձեր վստահելի աղբյուրը

Ժիրայր Սեֆիլյանի, Հրայր Թոփչյանի, Սասունիկ Կիրակոսյանի, Հովհաննես Պետրոսյանի, Գալուստ Գրիգորյանի, Ներսես Պողոսյանի, Գևորգ Սաֆարյանի գործով դատավարությունն այսօր հարցաքննվեց վկա Հովհաննես Մինասյանը:

Հովհաննես Մինասյանն ասաց, որ ամբաստանյալներից ճանաչում է Ժիրայր Սեֆիլյանին` «որպես ազգի հերոս»:

Դատավորի հարցին, թե ի՞նչ է հայտնի այս քրեական գործի վերաբերյալ,  նախաքննության ժամանակ հարցաքննվե՞լ եք, Հ. Մինասյանն ասաց. «Հարցաքննվել եմ երկու տարի առաջ, չգիտեմ ինչի եմ հարցաքննվել, ինչ են գրել: Ի՞նչ է ինձ հայտնի:  Ինչքան գիտեմ, մարդիկ պայքարի էին դուրս եկել ազնիվ ճանապարհով, բայց նրանց խանգարում էին: Գիտեմ, խուլիգանություն, նման բաներ չեն արել»:

Մեղադրողի հարցին, թե ծանո՞թ եք «Հիմնադիր խորհրդարան» կազմակերպությանը, վկան պատասխանեց. «Ինձ թվում է՝ հայրենասիրական կազմակերպություն է»: Նա նշեց, որ կողմնակից է խաղաղ երթերին, «հիմա էլ եմ կողմնակից»: 

Այնուհետև մեղադրող դատախազն ասաց, որ վկայի դատաքննության ու նախաքննական ցուցմունքներն իրար ամբողջությամբ հակասում են, միջնորդեց վերջինս նախաքննական ցուցմունքները հրապարկել:

Միջնորդությունը բավարարվեց, հրապարակվեց վկայի նախաքննական ցուցմունքը: 
Ցուցմունքը հրապարակելուց հետո Հովհաննես Մինասյանը հարցրեց, թե կարո՞ղ է փոխել այդ ցուցմունքը, «իրավունքի ունեմ չէ՞»:

«Խառը վիճակ էր, առաջին անգամ բռնել տարել էին քրեակատարողական, խառնվել էինք իրար: Կարող ա տենց է  ստացվել: Բայց այդքան երկար գրած չէի լինի ես: Բաներ կային, որ իրականությանը  չէին համապատասխանում»,- ասաց նա:

Հարցին, թե ձեր ձեռքո՞վ եք գրել ցուցմունքը , թե ոչ, Հ. Մինասյանը նշեց. «Չեմ հիշում, տվեք ձեռագրով կարամ իմանամ՝ ես եմ գրել, թե ով ա գրել: … Իմ ձեռագիրը չէ, քննիչն է գրել… »:

Ձեռք բերված փոխկապակցված ապացույցների բավարար համակցության հիման վրա զանգվածային անկարգություններ կազմակերպելու նախապատրաստության, կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու, փոխադրելու և շենքեր, շինություններ զավթելու նախապատրաստության համար Ժիրայր Սեֆիլյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, 235-րդ հոդվածի 3-րդ մասով, 35-219-րդ հոդվածի 3-րդ մասի 1-ին կետով, զանգվածային անկարգություններ կազմակերպելու նախապատրաստության համար Գևորգ Սաֆարյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու, փոխադրելու համար Հրայր Թոփչյանին, Սասունիկ Կիրակոսյանին, Հովհաննես Պետրոսյանին, Գալուստ Գրիգորյանին և Ներսես Պողոսյանին մեղադրանքներ են առաջադրվել ՀՀ քրեական օրենսգրքի 235-րդ հոդվածի 3-րդ մասով: