Դասադուլ անող ուսանողները չեն ներկայացել Պաշտպանության նախարարի հետ հանդիպմանը

Կրթություն, գիտություն 21:17 07/11/2017

Դասադուլ անող ուսանողները չեն ներկայացել Պաշտպանության նախարարի հետ հանդիպմանը

Պաշտպանության նախարար Վիգեն Սարգսյանն այսօր հանդիպում է ունեցող ուսանողների հետ և ներկայացրել է «Զինվորական ծառայության և զինծառայողի կարգավիճակի մասին» նոր օրենքի նախագիծը: «Արմենիա» հեռուստաընկերության «Ժամը» լրատվականի փոխանցմամբ՝ թեև նախարարը հանդիպմանը հրավիրել էր նաև ընդդեմ օրինագծի դասադուլ իրականացնող ուսանողներին, սակայն վերջիններս չէին ներկայացել քննարկմանը:

Վիգեն Սարգսյանը ափսոսանք է հայտնել բողոքի ակցիա իրականացնող ուսանողների՝ հանդիպմանը չներկայանալու կապակցությամբ և նշել է, որ նրանց բացակայությունը նշանակում է, որ իրենց համար առավել կարևոր է բուն գործընթացը, այլ ոչ թե խնդրին լուծում տալը: Սարգսյանն ընդգծել է, որ տարկետում լինելու է, ուղղակի փոփոխված և լրամշակված տարբերակով:

Նախարարը ուսանողներին է ներկայացրել օրենքի նախագծի մանրամասները և նշել է, որ պատրաստ է շարունակել քննարկումները նաև օրենքի նախագծի ընդունումից հետո:
Հիշեցնենք, որ Ազգային ժողովն առաջին ընթերցմամբ հավանություն է տվել «Զինվորական ծառայության և զինծառայողի կարգավիճակի մասին» օրենքի նախագծին, որով առաջարկվում է պարտադիր զինվորական ծառայության զորակոչից ուսումնառության նպատակով տարկետում տրամադրել միայն այն դեպքում, եթե քաղաքացին պաշտպանության նախարարության հետ պայմանագիր կնքի, պարտավորվելով ուսումնառության ընթացքում ռազմական պատրաստություն անցնել, իսկ ավարտելուց հետո ՊՆ կողմից նշված վայրում ու պայմաններով զինվորական ծառայություն անցնել: Օրենքով նախատեսվում է, որ զինվորական ծառայությունից տարկետում ստացած ուսանողները 2-ի փոխարեն պետք է ծառայեն 3 տարի:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: