Ձեր վստահելի աղբյուրը

Այսուհետ այն աշխատող մայրերը, որոնք ցանկություն կունենան մինչև երեխայի 2 տարեկանը լրանալը աշխատել, պետությունը կպարտավորվի հոգալ երեխայի դայակին վարձատրելու հարցը՝ որոշակի սահմանափակումներով: ԱԺ առողջապահության, սոցիալական հարցերի հանձնաժողովի նիստում այսպիսի օրենսդրական նախաձեռնություն ներկայացրեց ՀՀ աշխատանքի և սոցիալական հարցերի նախարար Արտեմ Ասատրյանը:

Նա նշեց, որ աշխատանքային գործունեության և ծնողական պարտականությունների մեկտեղման հնարավորությունների խթանման նպատակով առաջարկվում է երեխայի խնամքի արձակուրդում գտնվող ծնողներին պետական աջակցության տրամադրում՝ աշխատանքի վերադառնալու դեպքում:

«Ծրագրի բովանդակությունը հետևյալն է: Անձը, որը գտնվում է մինչև 2 տարեկան երեխայի խնամքի արձակուրդում, ստանում է 18 հազար դրամը, և եթե այդ անձը որոշում է վերադառնալ աշխատանքի, մենք առաջարկում ենք տրամադրել աջակցություն: Բնական է, եթե վերադառնում է աշխատանքի, երեխայի խնամքի խնդիր է առաջանում, երեխայի խնամքի կազմակերպումը կարող է լինել դայակ վարձելը: Եթե ծնողը դայակի է վարձում, մենք ասում ենք՝ այդ դայակի աշխատավարձի 50 տոկոսը, ինչքան աշխատավարձ կորոշեք դուք, բայց ոչ  նվազագույն աշխատավարձից ավել, որը 55 հազար դրամ է, կփոխհատուցի պետությունը:

Այսինքն, պայմանական եթե 110 հազար դրամից ավելի գումար ես որոշել տալ դայակին՝ որպես աշխատավարձ, մենք ասում ենք՝ կփոխհատուցենք 55 հազարը, մնացածը քո խնդիրն է: Այս դեպքում, բնականաբար, 18 հազար դրամն էլ չի վճարվում, ստացվում է, որ պետությունը 37 հազար դրամ է բյուջեից հանում՝ փոխարենն ակնկալելով ժողովրդագրական աճ, աշխատաշուկայում զբաղվածություն»,- նշեց նախարարը:

«Ելք» խմբակցության պատգամավոր Նիկոլ Փաշինյանը մտահոգություն հայտնեց, որ դայակները չեն ցանկանա հայտնվել հարկային դաշտում, դա նրանց ձեռնտու չէ:

Նախագիծը հանձնաժողովում դրական եզրակացություն ստացավ և առաջիկա քառօրյա նիստերի օրակարգում կընդգրկվի:

Հետաքրքիր է, որ ԱԺ-ում քննարկվում է դայակին վճարելու հարցը, բայց մանկամսուրների հարց. կամ մանկապարտեզների «ցանցի» ընդլայնման հարց չի քննարկվում: