Ձեր վստահելի աղբյուրը

ԱԺ արտաքին հարաբերությունների մշտական հանձնաժողովի նախագահ Արմեն Աշոտյանն առաջարկում է Հայաստան-ԵՄ նոր համաձայնագրի ենթադրվող ստորագրումից մեկ շաբաթ անց՝ դեկտեմբերի 1-ին, խորհրդարանական լսումներ անցկացնել՝ թարմ հետքերով քննարկելու փաստաթղթի ստորագրումը: Նման առաջարկով Արմեն Աշոըտյանը հանդես եկավ այսօր՝ ԱԺ արտաքին հարաբերությունների մշտական հանձնաժողովի նիստին:

«Իհարկե, մի կողմից կարող ենք ասել, որ ստորագրումից հետո փաստաթուղթը պետք է համապատասխան ընթացքով շրջանառության ենթարկվի Սահմանադրական դատարանի, այլ մարմինների կողմից, նոր միայն առաքվի ԱԺ՝ քննարկումների: Բնական է, որ այդ գործընթացը ևս տեղի կունենա: Մեր լսումներն ունենալու են բովանդակային կարևորություն և վստահ եմ, որ այդ փաստաթղթի հանրայնացման օրակարգը առաջին լսումներով չի սահմանափակվելու»,- ասաց նա:

Արմեն Աշոտյանն առաջարկեց դեկտեմբերի 1-ին կայանալիք լսումներին հրավիրել Հայաստանում հավատարմագրված ԵՄ անդամ երկրների դեսպաններին, ինչպես նաև Հայաստանում ԵՄ պատվիրակության ղեկավարին, փորձագիտական և հասարակական սեկտորի ներկայացուցիչների, այսինքն՝ առավելագույն մեծ շրջանակ ապահովել:

ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը նաև նշեց, որ հաշվի առնելով հարցի էությունը և բովանդակությունը՝ ճիշտ են համարում դիմել Եվրոպական ինտեգրման հարցերի մշտական հանձնաժողովին՝ լսումները համատեղ անցկացնելու առաջարկով:

«Մեր և նրանց մանդատներն այս հարցում համադրվում են, և կարծում եմ՝ ճիշտ կլինի, եթե երկու հանձնաժողովները միասնական որոշում կայացնեն»,- նշեց խորհրդարանականը:

Արմեն Աշոտյանը տեղեկացրեց, որ «Կոնրադ Ադենաուեր» հիմնադրամը համաձայնել է աջակցելու այս լսումների կայացմանը: Հաշվի առնելով, որ լսումներին մեծաթիվ հանրույթ է հրավիրվելու, կարիք է լինելու առնվազն երկու լեզվով թարգմանությունների, տեխնիկական բնույթի այլ աջակցության:

ԱԺ արտաքին հարաբերությունների մշտական հանձնաժողովի նախագահը հայտարարեց, որ Հայաստանը համաձայնագրի նախաստորագրումից հետո իր աշխատանքը կատարել է ամբողջությամբ: Եվրոպական երկրներում ևս բուռն աշխատանքներ են տարվում տեխնիկական խնդիրների լուծման ուղղությամբ:

«Մենք դրական սպասումներով ենք գնում խորհրդարանական լսումներին: Հայաստանը ելնում է այն հանգամանքից, որ նոյեմբերի 24-ին փաստաթուղթը ստորագրվելու է: ԱԳՆ աշխատակազմը, Բրյուսելում ՀՀ դեսպանատունը շարունակում են աշխատանքները: Չեմ ուզում քննարկել սցենար Բ-ն: Կարծում եմ՝ չեղարկման որոշման կարիք չի լինի»,- ամփոփեց պատգամավորը:

Նիստի ավարտին հանձնաժողովի անդամները միաձայն քվեարկեցին դեկտեմբերի 1-ին լսումներ կազմակերպելու օգտին: