Ձեր վստահելի աղբյուրը

««Զինվորական ծառայության և զինծառայողի կարգավիճակի մասին» ՀՀ օրենքի նախագծի տարկետման դրույթի դեմ ուսանողների պայքարի ձևը արվում է օրենքին համապատասխան, որևէ խնդիր չկա, մանավանդ, եթե այդ ամենն արվում է կամավորության սկզբունքով»,- այս մասին այսօր լրագրողների հետ հանդիպմանն ասաց կրթության ոլորտի փորձագետ Սերոբ Խաչատրյանը՝ նշելով, որ այս օրերին նա չի նկատել, որ ուսանողներին բռնի ձևով դասերից հանեն և ստիպեն ցույցերին մասնակցել։

Նրա խոսքով, սակայն, պայքարը փոքր-ինչ ուշացած է։

Ինչ վերաբերում է օրինագծի բովանդակային մասին, Խաչատրյանը նշեց, որ սա այնքան կոմպլեքս օրինագիծ է, որ միանշանակ ասել՝ կունենա միայն բացասական, կամ միայն դրական ազդեցություն, ճիշտ չէ։ 

«Մի կարևոր ասպեկտ կա, որի մասին այս օրերին ոչ ոք չի խոսում դպրոցական կրթությունը, բոլորը խոսում են, թե ինչպես այս օրենքի նախագիծը կազդի բուհերի և գիտության վրա։ Այս նախագիծը թերևս ամենաբացասական ազդեցությունը կունենա ավագ դպրոցների վրա։ Սովորական ավագ դպրոցներում շատ տղաներ լավ են սովորում, քանի որ նրանք  ձգտում են բարձր միավորներով ընդունվել, որպեսզի գործող տարկետման իրավունքից օգտվեն, այն որոշակի մոտիվացիա է տալիս տղաների որոշակի խմբի՝ լավ սովորելու։ Հիմա, եթե սա վերանում է, արդեն կարող են 7,5 միավորով ընդունվել համալսարան, քանի որ բացի մեկ-երկու ֆակուլտետից ուրիշ տեղ մրցակցություն չկա, հետևաբար, ԿԳՆ պետք է մտածի, թե ավագ դպրոցներում սովորող տղաներին ինչո՞վ է մոտիվացնելու, քանի որ առանց այդ էլ ցածր մոտիվացիան շեշտակի նվազելու է»,- մանրամասնեց փորձագետը։

Սերոբ Խաչատրյանը դժվարացավ ասել, օրինագիծն արդարությունը կվերականգնի՞, թե՞ ոչ. «Մեր ժողովրդի մեջ ունենք երկու՝ բաշարողների ու անբաշարների խումբ։ Բաշարողները մեր մշակույթում միշտ գտնում են ելքը, նրանց մեծ մասն այսօր կողմ է այս օրինագծին, քանի որ մտածում է՝ մի ճանապարհ կգտնի հարցը լուծելու համար։ Այսօր էլ մի այսպիսի ճանապարհ կա, որն աշխատում է։ Երբ նայում եմ ԿԳՆ պաշտոնական վիճակագրությունը, տեսնում եմ հետևյալը՝ մենք այսօր դպրոցներում ունենք աշակերտների սեռային հետևյալ բաշխվածությունը՝ 47 տոկոսը աղջիկներ են, 53 տոկոսը տղաներ։ Երբ նայում ենք Հայաստանից արտասահման մեկնած աշակերտների տվյալները՝ 40 տոկոսը աղջիկներ են, 60 տոկոսը տղաներ են։ Հասկանալի է, թե ինչու են ավելի շատ արտագաղթում տղաները, քանի որ նրանց գրանցումից հանելու և ուրիշ երկրում գրանցելու խնդիր կա։ Այս վիճակագրությունն առավել բնորոշ է 3-րդից 10-րդ դասարաններին»։

Փորձագետի կարծիքով՝ օրինագծի ընդունելու դեպքում ՊՆ-ն իր վրա է վերցնելու շատ կարևոր մանկավարժահոգեբանական ֆունկցիա, որ տղաներին չտանեն բանակ և նրանց հոգեբանորեն կամ ֆիզիկապես այնպես կոտրեն, որ նրանք հետո չկարողանան գիտությամբ զբաղվել։

Այնուամենայնիվ, Սերոբ Խաչատրյանը նշեց, որ օրինագծի մեջ լավ բաներ էլ կան, դրանցից մեկն այն է, որ առաջարկվում է ուսման վարձի փոխհատուցում։