Ձեր վստահելի աղբյուրը

ԱԺ Եվրոպական ինտեգրման հարցերի մշտական հանձնաժողովի անդամները՝ հանձնաժողովի նախագահ Նաիրա Զոհրաբյանի գլխավորությամբ, առաջիկա օրերին կայցելեն հանրապետության մի շարք քրեակատարողական հիմնարկներ՝ ծանոթանալու դրանց բուժական մասերի վիճակին:

«Երկուշաբթի կայցելենք մասնավորապես «Նուբարաշեն» և Դատապարտյալների հիվանդանոց: Այնուհետ՝ «Հրազդան» և «Արթիկ» քրեակատարողական հիմնարկներ: Կլինենք նաև Գորիսում, որտեղից լուրջ ահազանգեր ունենք, կայցելենք «Արմավիր» ՔԿՀ»,- հանձնաժողովի՝ այսօր կայացած նիստի ժամանակ այս մասին հայտարարեց հանձնաժողովի նախագահ Նաիրա Զոհրաբյանը:

ԱԺ պատգամավորը հիշեցրեց, որ ՀՀ մարդու իրավունքների պաշտպանի կողմից ՔԿՀ-ների բուժմիավորումների հետազոտության արդյունքում բազմաթիվ խախտումներ էին ի հայտ եկել:

«Խոսքը ժամկետանց, տնայնագործական պայմաններում պատրաստված դեղորայքի, բուժանձնակազմի որակավորման մասին է: Շատ դեպքերում բուժաշխատողների թվաքանակի պակասի պարագայում դատապարտյալները զբաղվում են ինքնաբուժությամբ: 

Մենք այժմ մշակում ենք օրենքի նախագիծ, որպեսզի առողջապահական ծառայություններ մատուցողները ենթակա չլինեն քրեակատարողական վարչությանը: Այս իրավասությունները, ինչպես եվրոպական երկրներում, պետք է պատկանեն կամ առողջապահության կամ արդարադատության նախարարություններին: Մենք նախարարություններին կդիմենք մեր առաջարկներով»,- տեղեկացրեց Նաիրա Զոհրաբյանը:

Պատգամավորի խոսքով, իրենք ահազանգեր ունեն առ այն, որ շատ բժիշկներ, կաշկանդվելով քրեակատարողական վարչության վերադասից, չեն ներկայացնում դատապարտյալի իրական առողջական վիճակը, որպեսզի վերջինս չտեղափոխվի դատապարտյալների հիվանդանոց: