Ձեր վստահելի աղբյուրը

Տարբեր համալսարանների ֆակուլտետներով շրջելուց հետո ուսանողները երթով հասան Կառավարության շենքի մոտ:

«Եկել ենք այստեղ հայտնելու մեր մտահոգությունը տարկետման իրավունքի սահմանափակման հետ կապված: Ցավոք ձեզնից մենք դեռ կարծիք չենք լսել, կցանկանանք լսել ձեր կարծիքը օրինագծի մասին և կմնանք այնքան ժամանակ մինչև կստանանք որևէ պատասխան»,- կառավարության շենքի դիմաց ասաց Դավիթ Պետրոսյանը՝ դիմելով վարչապետ Կարեն Կարապետյանին։

Բողոքող ուսանողներին մոտեցավ վարչապետի ավագ օգնական Արամ Վարդևանյանը։ Նա զրուցեց ուսանողների հետ «Զինվորական ծառայության և զինծառայողի կարգավիճակի մասին» ՀՀ օրենքի նախագծի մասին՝ ասելով. «Այո, դուք ճիշտ եք նշում, տարկետման ինստիտուտը որոշակիորեն սահմանափակվում է, բայց ասել որ այն վերանում է, նման իրավիճակ չկա։ Արդյոք դա հանգեցնում է կրթության պրոցեսի անընդհատությանն ու խաթարմանը, ոչ, իմ կարծիքով»։

Այնուհետև վարչապետի օգնականը հայտնեց, որ Կարեն Կարապետյանը պատրաստ է ընդունել հինգ հուգուց բաղկացած ուսանողների խմբին և լսել նրանց մտահոգությունները՝ առանց լրատվամիջոցների ներկայության։ Սակայն նրանք չհամաձայնվեցին նման ձևաչափով հանդիպել վարչապետին։