Ձեր վստահելի աղբյուրը

Ցմահ ազատազրկվածների խնդիրը շատ նուրբ և զգայուն խնդիր է: ԱԺ-ում լրագրողների հետ այսօր ունեցած զրույցում նման տեսակետ հայտնեց «Ծառուկյան» խմբակցության պատգամավոր Նաիրա Զոհրաբյանը՝ անդրադառնալով իր այն առաջարկին, որ որոշ ցմահ դատապարտվածների գործեր պետք է վերաբացվեն և նորից քննվեն։

«Ցմահ ազատազրկվածները, գիտեք, որ 104-ն էին։ Մի քանիսը մահացան, հիմա մոտ 94-95 ցմահ ազատազրկված ունենք, որոնց հարցը կարծում ենք պիտի վերանայվի: Դրանց մի մասը բանակում՝ բանակային ծառայության ժամանակ իրենց ծառայակցին կամ իրենց վերադասին սպանած անձինք են: Այստեղ խնդիրները բազմաթիվ են։

Եթե վերադասը կամ ծառայակիցը ցանկացել է այլ՝ անպարկեշտ բնույթի գործողություններ անել զինվորի հանդեպ կամ նրա արժանապատվությունը նվաստացնել և այլն, այս զինվորները դատապարտված են եղել նախկին խորհրդային օրենսգրքով, մահապատժի հոդվածով են ազատազրկվել։ Այնուհետև մահապատիժը հանվեց, և եթե այսօր նրանք դատապարտվեին նույն հանցանքի համար, դա մինչև 15 տարի ազատազրկումն է, բայց նրանցից որոշներն արդեն 20 տարի կրում են իրենց պատիժը:

Կոնկրետ այդ դեպքերի համար մենք կարծում ենք, որ գոնե պատժի ռեժիմի փոփոխությունը պետք է վերանայվի։ Խոսքը 7-8 ցմահ ազատազրկվածի գործերի մասին է»,- նշեց ԱԺ պատգամավորը։

Նաիրա Զոհրաբյանը տեղեկացրեց, որ որոշակի պահի իրենց են դիմել սպանվածների հարազատները՝ ասելով, որ եթե իրենց հարազատներին սպանած ցմահ դատապարտյալների պատիժը վերանայվի՝ վենդետա կտեսնեն նրանց նկատմամբ։

«Այստեղ պիտի հստակ տարանջատել, խոսքը չի վերաբերում այն ցմահ դատապարտյալներին, որոնք մասսայական սպանություններ են արել, մի քանի սպանություն են արել, անդամահատել են և այլն: Խոսքը վերաբերում է զուտ բանակում զինվորական ներքին կանոնադրական խախտումների պատճառով տեղի ունեցած սպանություններին: Մենք պետք է հաշվի նստենք այն ծնողների հետ, ում երեխաներին, ամուսիններին սպանել են, նուրբ հարց է»,- ասաց նա:

Խորհրդարանականը նշեց, որ վաղաժամկետ ազատ արձակման՝ նախկինում գործող հանձնաժողովն ընդհանրապես ավելորդ օղակ էր.

«Անգամ չէին գնում դատապարտյալի հետ հանդիպում, գիր-ղուշով որոշումներ էին կայացնում: Բացարձակ ոչ ադեկվատ և անհամարժեք որոշումներ էին կայացնում: Հիմա նոր համակարգ կգործի, բայց առ այս պահը մենք չենք տեսել իրենց աշխատանքի արդյունավետությունը: Հույս ունենանք, որ այդ հանձնաժողովը ևս կսկսի իր իրական գործառույթները կատարել»: