Ձեր վստահելի աղբյուրը

Անկարայում ձերբակալվել են Թուրքիայի «Մարդու իրավունքների միության» (İHD-ՄԻՄ) մի շարք անդամներ, այդ թվում՝ կազմակերպության ղեկավար Օզթուրք Թուրքդողանը:

«Էրմենիհաբեր»-ը գրում է՝ ըստ թուրքական «Demokrathaber.org» լրատվական կայքի՝ այսօր՝ նոյեմբերի 9-ին ՄԻՄ անդամները հավաքվել են Անկարայում գտնվող մարդու իրավունքների հուշարձանի մոտ՝ ցանկանալով իրենց բողոքն արտահայտել «աշխատանքս հետ եմ ուզում» ակցիայի մասնակիցների ձերբակալությունների դեմ: Իրավապաշտպանները բողոքել են նաև ոստիկանության կողմից մարդու իրավունքների հուշարձանը ցանկապատելու և դրան մոտենալն արգելելու դեմ:

Նշվում է, որ ՄԻՄ անդամները ցանկացել եմ մամուլի ասուլիս անցկացնել, ինչը թույլ չեն տվել ոստիկաններն ու ձերբակալել են նրանց: Մարդու իրավունքների միությունը հայտարարություն է տարածել, որում պաշտոնապես հայտնել է կազմակերպության 7 անդամների ձերբակալության մասին:

Աղբյուրը հիշեցնում է, որ հուլիսի 5-ին Ստամբուլում մի սեմինարի ժամանակ ձերբակալվել էին միջազգային իրավապաշտպան կազմակերպությունների 10 անդամներ, որոնց թվում նաև՝ գերմանացի իրավապաշտպան, «Amnesty International»-ի անդամ Պետեր Շտոյդթները: