Ձեր վստահելի աղբյուրը

Կենտրոն և Նորք-Մարաշ վարչական շրջանների ընդհանուր իրավասության դատարանում դատավոր Արշակ Վարդանյանի նախագահությամբ այսօր շարունակվեց ԼՂՀ ՊԲ նախկին հրամանատար, Արցախի հերոս Սամվել Բաբայանի, նրա մարտական ընկերոջ՝ Սանասար Գաբրիելյանի  և մյուսների գործով դատական նիստը:

Դատախազ Արամ Արամյանը հանդես եկավ մեղադրական ճառով: Նա միջնորդեց Սամվել  Բաբայանին մեղավոր ճանաչել և դատապարտել ազատազրկման  7 տարի ժամկետով՝ առաջնորդվելով ՀՀ քրեական օրենսգրքի 38-235-րդ հոդվածի 2-րդ մասով և ՀՀ քրեական օրենսգրքի 190-րդ հոդվածի 1-ին մասով, Սանասար Գաբրիելյանին դատապարտել 4 տարվա ազատազրկման ՝ ՀՀ քրեական օրենսգրքի 235 հոդվածի 2-րդ մասով, Արմեն Պողոսյանին՝ 3 տարվա ազատազրկման ՝ ՀՀ քրեական օրենսգրքի 235-րդ հոդվածի 2-րդ մասով, նրանց նկատմամբ ընտրված կալանավորումը թողնել անփոփոխ:

Մեղադրող դատախազի խոսքով՝ Սամվել Բաբայանը մեղավոր է առաջադրված երկու մեղադրանքներով՝ ռազմամթերքի ապօրինի շրջանառություն և փողերի լվացում։

Ըստ մեղադրանքի՝ Բաբայանը ներկոտված 5000 եվրո թղթադրամը փորձել է մաշեցնել և դնել շրջանառության մեջ։

Ինչ վերաբերում է «Իգլա» ԶՀՀ ձեռք բերելուն, մեղադրողը ներկայացրեց, որ նյութապես շահագրգռելով Սանասար Գաբրիելյանին`  Սամվել Բաբայանը խոստացել է  նրան տալ 50000 եվրո՝ հանցավոր մտադրությունն իրականացնելու նպատակով։

Դատախազն իր ճառում հայտարարեց, որ պաշտպանության կողմը դատաքննության ընթացքում փորձել է ապացույց հանդիսացող «Իգլա» տեսակի զենիթահրթիռային համալիրը ներկայացնել որպես անպիտան խողովակ կամ իրենց խոսքով՝ «տրուբա»։

Նա նաև հիշեցրեց դատարան հրավիրված փորձագետի հարցաքննության ու փորձագետի եզրակացության մանրամասները, համաձայն որոնց «Իգլա»-ի խողովակն ու հրթիռը հանդիսանում են ռազմամթերք։

«Առնվազն կասկածելի է՝ ինչպե՞ս պաշտպանական համակարգում երկար տարիներ աշխատած, պաշտպանության նախարարի  պաշտոն զբաղեցրած Բաբայանը չի կարող տարբերել զենիթահրթիռային համակարգը անպիտան տրուբայից», - հայտարարեց նա։

Գործով մյուս ամբաստանյալներ՝ Դավիթ Հարությունյանին մեղադրողը միջնորդեց դատապարտել 2 տարվա ազատազրկման՝ ՀՀ քրեական օրենսգրքի 38-190-րդ հոդվածի 1-ին մասով, Ժորա Զաքարյանին դատապարտել 2 տարվա ազատազրկման՝ ՀՀ քրեական օրենսգրքի 38-190-րդ հոդվածի 1-ին մասով, նրա նկատմամբ նշանակված պատիժը պայմանականորեն չկիրառել և սահմանել փորձաշրջան՝  3 տարի ժամկետով, Կարեն Քոչարյանին դատապարտել 3 տարի ժամկետով՝ ՀՀ քրեական օրենսգրքի 38-190-րդ հոդվածի 1-ին մասով, Անդրանիկ Քոչարյանին 2 տարի նշանակված պատիժը պայմանականորեն չկիրառել և սահմանել փորձաշրջան 3 տարի ժամկետով:

Մեղադրական ճառի ավարտից հետո լրագրողները Սամվել Բաբայանից հետաքրքրվեցին` ի՞նչ կարծիք ունի հնչած մեղադրականի  մասին:

«Ժամանակը կգա, կխոսենք»,-ասաց նա:

Հաջորդ դատական նիստը, որի ընթացքում պաշտպանական կողմը հանդես կգա ճառով, կկայանա նոյեմբերի 20-ին։