Շաքարային դիաբետը հիվանդությո՞ւն, թե՞ ապրելակերպ
Հայաստանում շաքարային դիաբետով հիվանդ 530 երեխա կա: Նոյեմբերի 14-ին՝ Շաքարային դիաբետի դեմ պայքարի համաշխարհային օրը, լրագրողների հետ հանդիպմանն այս մասին նշեց էնդոկրինոլոգ Գայանե Բայբուրդյանը: Նա նշեց, որ աշխարհում շաքարային դիաբետ ունի մոտ կես միլիարդ մարդ, Հայաստանում նրանց թիվը պաշտոնական տվյալներով հասնում է 80 հազարի, սակայն պետք է հաշվի առնել, որ ոչ բոլոր հիվանդներն են հաշվառված:
Հայաստանում և աշխարհում հիվանդացության նույն տեմպերն են, սակայն փաստ է, որ հիվանդությունն ահռելի տեմպերով շարժվում է առաջ: Բայբուրդյանը նշում է՝ շաքարային դիաբետը կարելի է համարել ոչ թե հիվանդություն, այլ ապրելակերպ, սակայն միայն մի դեպքում՝ երբ այն ճիշտ վերահսկվում է: Հակառակ դեպքում այն դառնում է ծայրահեղ ծանր հիվանդություն:
«Կարևոր է նաև ինքնահսկումը: Հիվանդներին պետք է սովորեցնել՝ երբ դիմեն բժիշկի, երբ լինեն ինքնուրույն: Բժշկությունն ընդհանուր կարծիքի չի եկել՝ դիաբետի պատճառը գենետիկ նախատրամադրվածությու՞նն է, թե՞ այլ գործոններ: Մեծահասակների դեպքում նշանակություն ունի գենետիկան, սննդակարգը, ապրելակերպը: Բայց դժվար է ասել պատճառները, երբ 1 – 1,5 տարեկան երեխան է ունենում այս հիվանդությունը»,- ասաց նա:
Բժիշկը հերքեց տարածված կարծիքը, թե քաղցրի պատճառով կարող է շաքարային դիաբետ առաջանալ, սակայն խորհուրդ տվեց քաղցրը չչարաշահել:
«Երազ» բարեգործական հիմնադրամի տնօրեն Կարինե Մխիթարյանը նշեց, որ իրենց հիմնադրամը գործում է 2010 թվականից: Իրենք փորձում են բարելավել շաքարային դիաբետ ունեցող երեխաների կյանքը: 530 երեխաներից նրանք առանձնացրել են 6 խոցելի կատեգորիաների երեխաների, ամսվա կտրվածքով նրանց ապահովում են անհրաժեշտ քանակությամբ թեստ-երիզներով: Դրանց մեկ տուփի շուկայական արժեքը միջինը 7 – 8000 դրամ է, ամսական 1 - 3 տուփ թեստ-երիզ են տրամադրում հիվանդ երեխաներին, 1 –ական տուփ էլ տրամադրում է առողջապահության նախարարությունը:
Հիմնադրամը տեղեկատվական, հոգեբանական աջակցություն է տրամադրում, կազմակերպում մեկշաբաթյա ճամբարներ՝ բժիշկների հսկողության ներքո, երեխաներն ու նրանց ծնողները հասկանում են՝ իրենք մենակ չեն իրենց խնդրի հետ:
Մխիթարյանը նշեց, որ խնդրահարույց է երեխաներին հաշմանդամության կարգ տրամադրելու հարցը: Կա ընտանիք, որտեղ երկու երեխան էլ շաքարային դիաբետ ունեն, սակայն նրանցից մեկն է կարգ ստացել: Հաշմանդամության կարգ ստանալու դեպքում մոտ 21 000 դրամ թոշակ է տրամադրվում, որը գոնե ինչ-որ չափով թեթևացնում է ֆինանսական հոգսը: Իսկ երբ այդ ամենը չի ունենում ընտանիքը, շատ դժվար է լինում միայնակ պայքարել դրա դեմ:
Բանախոսներն ընդգծեցին՝ շաքարային դիաբետը չի վերանում, սակայն այն կարելի է շատ լավ կառավարել:
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
