Ձեր վստահելի աղբյուրը

Արտակարգ իրավիճակների նախարարությունում այս տարվա ընթացքում՝ նոյեմբերի 14-ի դրությամբ Երևան քաղաքում գրանցվել է մարդկանց վերելակում արգելափակման 204 դեպք:

Panorama.am-ին նախարարության տրամադրած տվյալների համաձայն, վերջին երեք տարիներին՝ 2015-2017թթ. Երևանում վերելակների շահագործման ժամանակ տեղի է ունեցել երկու արտադրական դժբախտ դեպք՝ մեկ ծանր վնասվածքներ ստանալու և մեկ  մահացու ելքով:

Հիշեցնենք, որ 2015 թվականի մարտի 21-ին լիազոր կառավարիչ Ա.Հայրապետյանի կողմից շահագործվող, ք. Երևան, Բաշինջաղյան 2-րդ նրբ. 1շ. հասցեում տեղադրված վերելակը պոկվել է, ինչի հետևանքով խցիկում գտնվող ուղևորը մահացել է: Վերջին անգամ վերելակը տեխնիկական անվտանգության հերթական փորձաքննության ենթարկվել էր 06.12.2013թ.-ին:

Հաջորդ դժբախտ պատահարը 2016-ին էր: Նոյեմբերի 30-ին «Արգիշտի» համատիրության կողմից շահագործվող, ք. Երևան, Խաղաղ Դոնի 23շ. 1-ին մուտք հասցեում տեղադրված վերելակի խցիկի դռների էլեկտրական ռելեի խափանման պատճառով խցիկը բաց դռներով շարժվել է ներքև, ինչի հետևանքով խցիկում գտնվող ուղևորը ստացել է մարմնական վնասվածքներ: Վերջին անգամ վերելակը տեխնիկական անվտանգության հերթական փորձաքննության ենթարկվել էր դեպքից մոտ մեկ տարի առաջ:

Այս տարվա ընթացքում վերելակի հետ խնդիր էր առաջացել հուլիսի 23-ին: Քանաքեռ - Զեյթուն վարչական շրջանի Ռուբինյանց փողոցի թիվ 1ա շենքի 1-ին մուտքի վերելակը 8-րդ հարկից իջնելիս խափանվել է և պարբերաբար ընդհատումներով հասել է առաջին հարկ:  Վերելակի մեջ նաև երեխաներ էին եղել: Մինչ հրշեջ-փրկարարների կանչի վայր հասնելը՝ Ն.Փեթակչյանը (ծնվ. 1987թ.), Մ.Բադալյանը (ծնվ. 2015թ.), Ս. Բադալյանը (ծնվ. 1986թ.), Թ. Գրիգորյանը (ծնվ. 2012թ.) և  Գ. Գրիգորյանը (ծնվ. 2014թ.) տեղի ուժերով դուրս են բերվել վերելակից:

Այնուհետ հրշեջ-փրկարարները վերելակից դուրս են բերել Ա. Բադալյանին (ծնվ. 1951թ.): Տուժածներ չեն եղել : Փրկարար ծառայության ավագ լեյտենանտ Ա.Թառոյանը վերելակից դուրս բերված քաղաքացիներին ցուցաբերել է հոգեբանական աջակցություն:

Սրանք, հիշեցնենք, այն դեպքերն են, որոնց մասին քաղաքացիներն ահազանգել են ԱԻՆ: Շատ դեպքերում էլ քաղաքացիները չեն ահազանգում:

Այս տարվա ընթացքում «Տեխնիկական անվտանգության կենտրոն» ՊՈԱԿ-ի կողմից փորձաքննության արդյունքում  բացասական եզրակացություն է ստացել երևանյան շենքերի  31 վերելակ: Դրանց մեծ մասը Քաջազնունու, Վրացյան, Շինարարների, Հալաբյան փողոցների շենքերում են: 

Հիշեցնենք, որ Երևանի քաղաքապետարանի շենքի վերելակը փոխելու համար մայրաքաղաքի հաջորդ տարվա բյուջեից նախատեսում են տրամադրել մոտ 78 մլն դրամ: Ի դեպ, նախարարության տրամադրած վթարային վերելակների թվում քաղաքապետարանինը չկա: Չի բացառվում է, որ փորձաքննությունը կատարել է մասնավոր ընկերությունը:

Երևանի ողջ տարածքում վերելակների հիմնանորոգում ծրագրով նախատեսվել է 108,770.1 հազ դրամ՝ բազմաբնակարան շենքերի վերելակների համար սարքավորումների ձեռք բերման և տեղադրման նպատակով։

Թե բացասական եզրակացության արժանացած 31 վերելակներից քանիսն այդ գումարով  կփոխվեն, դժվար չէ հաշվել, եթե հիմք ընդունենք քաղաքապետարանի շենքի վերելակի փոխելու համար նախատեսված գումարը: