Ձեր վստահելի աղբյուրը

Ազգային ժողովում 2018 թվականի պետական բյուջեի մասին օրինագծի քննարկման ժամանակ «Ելք» խմբակցության ղեկավար Նիկոլ Փաշինյանը մի քանի դիտարկում ներկայացրեց ՀՀ ֆինանսների նախարար Վարդան Արամյանին՝ խնդրելով, եթե կարող է հիմնավորի դրա հակառակը։

«Թոշակները, նպաստները, նվազագույն աշխատավարձը չեն ավելանում 2018 թվականի բյուջեով։ Առողջապահության ծախսերը նվազում են 5 մլրդ դրամով, սոցիալական ծախսերը նվազում են 300 մլն դրամով, կրթության ծախսերը նվազում են շուրջ 700  մլն դրամով, արտաքին պարտքը աճում է,  սրանք զուգահեռ գներն աճում են, և 2018 թվականը լինելու է ամենամեծ գնաճով տարին՝ վերջին տարիների համեմատ։ Այս արձանագրումը նշանակում է, որ աղքատության ծավալը չի կրճատվելու, աղքատներն ավելի են աղքատանալու, և մարդիկ 10 տոկոսով ավելի վատ են ապրելու 2018 թվականին, բայց բյուջեում ունենք մի հոդված, որն ավելացել է 437 տոկոսով,  որի վերնագիրն է «Պետական աշխատողների պարգևատրումներ, դրամական խրախուսումներ և հատուկ վճարներ», ավելացել է շուրջ 2,5  մլրդ դրամով»,- ներկայացրեց պատգամավորը։

Վարդան Արամյանը պատգամավորի ելույթը ձևակերպեց հետևյալ կերպ՝ արդյոք կարողանում ենք լուծել նաև սոցիալական խնդիրներ 2018-ի բյուջեի նախագծով:

«Սովորաբար բյուջեն մեկ տարով չի ծրագրվում, պետք է 4-5 տարվա տեսլական ունենաս: Միջին թոշակը 2013թվականին եղել է 30 հազար դրամ, այսօր դա 41 հազար դրամ է, աճը շուրջ 30 տոկոս է, բավարա՞ր է դա արդյոք, որ մեր թոշակառուները իրենց նորմալ զգան, իհարկե բավարար չէ: Նվազագույն աշխատավարձը 2012-ին եղել է 32500 դրամ, այժմ 55 հազար դրամ է: Ապագայի մասին խոսելիս պետք է անպայման հաշվի առնել նախորդ տարվա տենդենցը և ապագայի տենդենցը։ Սոցիալական խնդիրները լուծելու համար պետք չի միայն թոշակ ու նպաստ տալ, պետք է պայմաններ ստեղծել, որ մարդն այդ իրավիճակից դուրս գա։ Օրինակ՝ գյուղական համայնքներում փորձում ենք մարդուն օգնել գյուղատնտեսական արտադրանքի համար վարկ վերցնել արտոնյալ պայմաններով, որ արտադրանք ունենա, իրացնի»,- պատասխանեց նախարարը։

Նիկոլ Փաշինյանն իր արձագանքում հիշեցրեց ավելի վաղ իր բարձրացրած խնդիրը. սահմանամերձ համայնքներում արտադրական ձեռնարկությամբ զբաղվողներին բանկերը վարկ են տալիս ավելի բարձր տոկոսադրույքներով՝ պատճառաբանելով, թե ռիսկային գոտում են:

«Ձեր ասածով ստացվում է, որ նախորդ տարիներին այնքան աշխատանք եք արել, հեղեղել ենք մարդկանց սոցիալական ապահովության գործիքներով, որ հիմա պիտի թողնենք, մի քիչ հետ գա։ Փաստն այն է, որ չի հաջողվում աղքատության մակարդակը  կրճատել, 1-2 տոկոսն էլ վիճվարչության պետերին, աշխատողներին կառավարությունը համոզում է, որ մի ստորակետ այս կամ այն կողմ դնեն»,- ասաց Նիկոլ Փաշինյանը:

Նախարարը հավելեց, որ պետք է հաշվի նստել օբյեկտիվ պատճառների հետ. «Լավագույն  տարբերակը սոցիալապես վատ վիճակում գտնվող մարդկանց համար աշխատատեղեր և հնարավորություններ ստեղծելն է, որպեսզի եկամուտ գեներացնեն»։