Ձեր վստահելի աղբյուրը

«Զգացական, ամբոխավարական, ինչ-ինչ պատճառներով նյարդային դարձածների գնահատականները եթե թողնենք մի կողմ, ապա կմնան թվերն ու փաստերը, որոնք վկայում են կառավարության կամքն ու ջանքը՝ երկիրը կայունացնելու և տնտեսական զարգացման հիմքեր ստեղծելու»,- ԱԺ-ում  2018թվականի պետական բյուջեի նախագծի քննարկմանն ասաց ԱԺ ՀՅԴ խմբակցության քարտուղար Աղվան Վարդանյանը՝ նշելով,  որ սա է այս բյուջեի փիլիսոփայությունը։

Պատգամավորը նշեց, որ 2016-ին 0,2 տոկոս տնտեսական աճ է եղել, 2017-ին` 3,2 տոկոս, իսկ արդեն 2018-ին  արդեն 4.5 տոկոս տնտեսական աճ է նախատեսվում. «Բյուջեն նաև արտաքին պարտքը տոկոսային առումով փոքր, բայց այն նվազեցնելու նպատակադրում ունի: Բյուջեն նախորդ տարվա համեմատ շուրջ 100 մլդ դրամով աճելու է, ինձ համար, սակայն, շատ ավելի բնութագրական ցուցնիշ է ընթացիկ և կապիտալ ծախսերի հարաբերակցությունը»,-ասաց նա:

Աղվան Վարդանյանը բնական համարեց բյուջեի քննարկման ժամանակ շահարկվող սոցիալական խնդիրները, բայց նշեց,  եթե նպատակը քննադատելն է, ապա պատճառներ միշտ կգտնվեն։
«Ինձ համար գոնե տեսանելի է, որ բարեփոխումներն ընթացքի մեջ են, գերխնդիր է կառավարման միջոցները, առկա սուղ միջոցները նպատակային ծախսելը»,- հավելեց դաշնակցական պատգամավորը։

Հանրապետական խմբակցության ղեկավար Վահրամ Բաղդասարյանի խոսքով՝ բյուջեի նախագիծն միտված է ստվերի կրճատմանը, գործարար միջավայրի հավասարության ապահովմանը, հարկեր/ՀՆԱ ցուցանիշի բարելավմանը։

«Համոզված եմ, որ բյուջեում արտացոլված մակրոտնտեսական ցուցանիշները բխում են կառավարության, ՀՀԿ-ի ծրագրից, իրատեսական են, ոչ մի թիվ շինծու չէ, և դրանք հիմքեր պետք է ստեղծենք հաջորդ տարիների բարելավման համար»,-ասաց նա:

Ինչ վերաբերում է հարկային դաշտում հավասարության մասին, ՀՀԿ-ականն ասաց. «Օրենքը հավասար է բոլորի համար, առավել ևս հարկային դաշտում։ ՊԵԿ-ի սուրբ պարտականություն է ապահովել հավասար դաշտ։ Եվ մենք՝ որպես խորհրդարանական վերահսկողություն իրականացնող, պետք է մի բան էլ պարտադրենք, որ ՊԵԿ-ը իր պարտականությունները կատարի, այլ ոչ թե խոչընդոտենք: Այստեղ մեկ «Մոլի» քննադատություններով ՊԵԿ-ի աշխատանքն ենք գնահատում, չի կարելի, ընդհանուր պետք է գնահատական տրվի»։