Ձեր վստահելի աղբյուրը

«Մեր պետական պարտքը կառավարելի է, իսկ դա երևում է նրանից, որ արդեն 2018-ին ՀՆԱ-ի մեջ պետական պարտքը կայունանում է և մի տոկոսով իջնում»,- այսօր Ազգային ժողովում 2018 թվականի բյուջեի քննարկման ժամանակ հայտարարեց ՀՀ փոխվարչապետ Վաչե Գաբրիելյանը։

«Դա բնավ չի նշանակում, որ մենք չենք շարունակելու մեր զարգացման ծրագրերը, շարունակելու ենք, ուղղակի անելու ենք չափավորված կերպով՝ համակցելով ընդհանուր կայունության հետ։ Դա նշանակում է, որ մենք մեր ներքին ծրագրերն ավելացրել ենք, որպեսզի հենց ներքին ներդրումների վրա ուղղորդենք և ստեղծենք այդ հնարավորություններ, որոնք ոչ միայն տնտեսական աճ են ապահովում, այլև մեր քաղաքացիների համար կենսապայմաններ: Օրինակ՝ գյուղացիական համայնքներում կենսունակության ճանապարհներ ենք կառուցում, ինչը բացի տնտեսական հնարավորություններից՝ նաև կենցաղի բարելավում է նշանակում»,- ասաց փոխվարչապետը։

Նրա խոսքով՝ բյուջեն, որպես քաղաքական փաստաթուղթ, շատ հստակ արտացոլում է ինչու և ինչի համար են տրված առաջնահերությունները։

«Կան հերթականություններ, եթե մենք սկսենք ուղղակի ծախսերի ավելացումը, ապա երբեք չենք կարողանալու այն տեմպին գալ, որի հետևանքով մենք կարողանալու ենք մոտ ապագայում ավելի մեծացնել այդ ծախսերը»,- ասաց Վաչե Գաբրիելյանը՝ կոչ անելով քվեարկել 2018-ի բյուջեի օգտին։