Ձեր վստահելի աղբյուրը

ՀՀ արտգործնախարար Էդվարդ Նալբանդյանը հատկանշական է համարում, որ Բրազիլիայի արտգործնախարար Ալոիզիո Նունես Ֆերեիրայի այցելությունը Հայաստան տեղի է ունենսւմ երկու երկրների միջև դիվանագիտական հարաբերությունների 25-ամյա հոբելյանական տարում։ Այս մասին ՀՀ արտգործնախարարը հայտարարեց բրազիլցի գործընկերոջ հետ երևանյան համատեղ մամուլի ասուլիսի ժամանակ։

«Սա լավ առիթ է միջպետական հարաբերությունների քառորդդարյա պատմությունը գնահատելու և երկկողմ համագործակցության առավել խորացմանը միտված ծրագրերը քննարկելու ու պայմանավորվածություններ ձեռք բերելու համար»,- նշեց Էդվարդ Նալբանդյանը:

Բարձրաստիճան պաշտոնյան տեղեկացրեց, որ այսօր նախատեսված է Բրազիլիայի արտգործնախարարի հանդիպումը ՀՀ նախագահ Սերժ Սարգսյանի հետ:

«Սա նախարար Նունեսի առաջին այցն է Հայաստան, ով մեր երկրի լավ բարեկամն է, նա եղել է Բրազիլիայի Սենատում Հայաստանի հետ բարեկամության խմբի նախագահը և Բրազիլիայի Սենատի կողմից Հայոց ցեղասպանության ճանաչման նախաձեռնողը։ Մեր հանդիպումից առաջ Ալոիզիո Նունես Ֆերեիրան առավոտյան այցելել է Ծիծեռնակաբերդ՝ հարգանքի տուրք մատուցելու Հայոց ցեղասպանության զոհերի հիշատակին»,- տեղեկացրեց ՀՀ արտաքին գերատեսչության ղեկավարը։

Նա նաև հայտնեց, որ բրազիլացի գործընկերոջ հետ կարևորել են հաստատված արդյունավետ երկկողմ քաղաքական երկխոսությանը, ընդգծել իրավապայմանագրային դաշտի ընդլայնման անհրաժեշտության մասին։

Բացի այդ՝ ստորագրվել է «Հայաստանի Հանրապետության կառավարության և Բրազիլիայի Դաշնային Հանրապետության կառավարության միջև առևտրային և ներդրումային համագործակցության մասին» փոխըմբռնման հուշագիրը: Անդրադարձ է կատարվել հայ-բրազիլական օրակարգի հարցերի լայն շրջանակի, մտքեր են փոխանակվել միջազգային ատյաններում փոխգործակցության առավել սերտացման շուրջ:

«Գոհունակությամբ արձանագրեցինք, որ արդյունավետ համագործակցություն է ծավալվել միջխորհրդարանական ձևաչափով: Այսօր աշխարհագրական հեռավորությունը հետզհետե կորցնում է խոչընդոտող գործոնի դերը: Այդ առումով, երկու տարի առաջ Հայաստանի և Բրազիլիայի միջև մուտքի արտոնագրային ռեժիմի ազատականացումը նոր՝ առավել դյուրին ու լայն հնարավորություններ է բացում երկու երկրների ժողովուրդների միջև փոխայցելությունների աշխուժացման, կապերի ամրապնդման համար»,- շեշտեց ՀՀ արտգործնախարարը:

Էդվարդ Նալբանդյանը նաև տեղեկացրեց, որ Բրազիլիայի արտաքին հարաբերությունների նախարարին ներկայացրել է Արցախյան հիմնախնդրի կարգավորման գործընթացի առաջմղման ուղղությամբ Հայաստանի և ԵԱՀԿ Մինսկի խմբի համանախագահ երկրների կողմից գործադրվող համատեղ ջանքերը՝ կարևորելով անկողմնակալ և հավասարակշռված դիրքորոշումը հիմնահարցի առնչությամբ և միջնորդ երկրների առաջարկությունների սատարումը: