Ձեր վստահելի աղբյուրը

ՌԴ արտգործնախարար Սերգեյ Լավրովի առաջիկա տարածաշրջանային այցը պաշտոնական է լինելու։ Բրազիլիայի արտգործնախարար Ալոիզիո Նունես Ֆերեիրայի հետ համատեղ մամուլի ասուլիսի ժամանակ այսօր այս մասին հայտարարեց ՀՀ արտգործնախարար Էդվարդ Նալբանդյանը։

«Լավրովը այստեղ է լինելու ամսի 20-21-ին։ Այցելությունն առաջին հերթին նվիրված է լինելու դիվանագիտական հարաբերությունների հաստատման 25-ամյակին։ Այցելության շրջանակներում մի շարք այլ միջոցառումներ ևս նախատեսված են։ Սերգեյ Լավրովը հանդիպում  կունենա նաև ՀՀ նախագահի հետ, բանակցություններ կկայանան ԱԳՆ-ում, հնարավորություն կունենանք նաև մամուլի ասուլիս կազմակերպել, որի ժամանակ թե ինձ, թե Լավորվին հնարավոր կլինի հարցեր ուղղել»,- տեղեկացրեց արտգործնախարարը։

Էդվարդ Նալբանդյանն ընդգծեց՝ Ռուսաստանը ԵԱՀԿ Մինսկի խմբի  եռանախագահող երկիր է և բավական կարևոր դերակատարություն ունի Լեռնային Ղարաբաղի հիմնախնդրի կարգավորման ջանքերում։

«Ռուսաստանի հետ մենք ունենք դաշնակցային-ռազմավարական հարաբերություններ։ Նոր այցելությունը հնարավորություն կտա քննարկելու երկկողմ հարաբերություններին վերաբերող հարցերի լայն շրջանակ։ Հարցերի շրջանակը շատ լայն է, մենք ունենք դաշնակցային հարաբերություններ, և դրանով արդեն շատ բան է ասված։ Դրանք խորը և բազմաբովանդակ հարաբերություններ են, և մենք ջանք չենք խնայում, որ այդ հարաբերություններն առավել ամրապնդվեն և զարգանան»,- նշեց նա։

Լրագրողների հարցին՝ հնարավո՞ր է, որ Լավրովը Հայաստան գալիս է արցախյան հիմնախնդրի կարգավորման նոր առաջարկներով, Էդվարդ Նալբանդյանը պատասխանեց.

«Հիմնախնդրի կարգավորման գործընթացում հեծանիվ հնարելը դժվար է։ Այս բոլոր տարիների ընթացքում բազմաթիվ աշխատանքային փաստաթղթեր ենք քննարկել, բայց իրականության մեջ բանակցությունների հենքը նույնն է մնում։ Եթե Ադրբեջանը մի փոքր աչալուրջ լինի այն կոչերին և մոտեցումներին, որ եռանախագահող երկրները ներկայացնում են որպես կարգավորում, ապա այս գործընթացն առաջ տանելու և արդյունքներ ունենալու առավել հնարավորություններ կբացվեն»,- ամփոփեց ՀՀ արտգործնախարարը։