Ձեր վստահելի աղբյուրը

Այսօր վաղ առավոտից լարված իրավիճակ է Արմավիրի մարզի Ջրարբի գյուղում։ Դպրոցի երեխաները դասադուլ են անում, իսկ նրանց ծնողները հավաքվել են դպրոցի բակում և  բողոքում են դպրոցի անմխիթար վիճակից։

Անմխիթար, տարրական պայմաններից զուրկ դպրոցում սովորող աշակերտների թիվը 200-ից ավելի է:

Ծնողների խոսքերով՝ դպրոցում նորմալ պատուհաններ չկան, ջեռուցում, նույնիսկ գույք չկա:  «Երկու տարի առաջ խոստացել էին, որ դպրոցը կվերանորոգեն, բայց ոչինչ էլ չեն արել:  Կառավարությունից մի անգամ չեն գալիս հարցնեն, թե ինչ խնդիր կա: Երեխաներին ասում են՝ տանից բարձ բերեք, դրա վրա նստեք, որ չմրսեք: Էսօր բարձ են ուզում, վաղն էլ դոշակ կուզեն»,- վրդովված ասում են ծնողները:

Նրանց խոսքով՝ դասարաններում ցուրտ է, պատուհանների արանքից  փչում է,  տանիքից կաթում է: «Ավելի լավ է երեխաները տանը մնան, քան գան դպրոց ու հիվանդանան: Մենք էլ ենք այս դպրոցում  սովորել, նույն պայմանները մեր ժամանակ է եղել ու հիմա չենք ցանկանում, որ այդ դաժան վիճակում մեր երեխաները հայտնվեն: Դպրոցում նույնիսկ զուգարան չկա», - նշում են գյուղացիներն ու հավելում. «Ընտրությունների ժամանակ այնպիսի խոստումներ են տալիս, ընենց են մտնում հոգուդ մեջ, որ ասում ես՝ վաղը գալու են գործ անեն, բայց հենց ընտրվում են, իրանց ոչ մեկ չի տեսնում: Ընտրությունների համար էդքան գումար են ծախսում, բայց գյուղի էրեխեքը նման դպրոցում են սովորում, ինչի՞ համար»:

Ջրարբի գյուղի բնակիչների հետ հանդիպել է  Արմավիրի մարզպետ Աշոտ Ղահրամանյանը՝  խոստանալով 10 օրվա ընթացքում փոխել գյուղի դպրոցի պատուհաններն ու ապահովել ջեռուցումը։

Գյուղացիների հետ զրույցում մարզպետը վստահեցրել է, որ խնդրի մասին տեղյակ կպահի ՀՀ վարչապետ Կարեն Կարապետյանին։