Ձեր վստահելի աղբյուրը

«Իմ պաշտպանյալին առաջադրված մեղադրանքներն անհիմն են»,- այսօր Կենտրոն և Նորք Մարաշ վարչական շրջանների ընդհանուր իրավասության դատարանում Սամվել Բաբայանի և մյուսների գործով դատական նիստում պաշտպանական ճառում հայտարարեց Բաբայանի փաստաբան Ավետիս Քալաշյանը՝ ներկայացնելով իր փաստարկները։

Փաստաբանն ասաց. «Սանասար Գաբրիելյանը դատավարության ընթացքում մշտապես ասել է, որ բանակի համար նպատակ է ունեցել ձեռք բերել «Իգլա» տեսակի զենիթահրթիռային համալիր՝ իր սեփական միջոցներով, և զենքի համար գումար Բաբայանը չի տրամադրել: Ձեռք բերված զենքը պլանշետային համակարգչով լուսանկարել են և ցույց տվել Սամվել Բաբայանին, ով ասել է, որ ամբողջական չէ»։

Քալաշյանի խոսքով՝ Բաբայանի առնչությունը այդ «Իգլայի» հետ եղել է այնքանով, որ նայել է լուսանկարը և իր կարծիքը հայտնել, թե դա այդ վիճակում իրենից ինչ է ներկայացնում. «Եթե Գաբրիելյանի ցուցմունքներին նշանակություն տրվեր, ապա Բաբայանի նկատմամբ նման մեղադրանք չէր առաջադրվի: Մեղադրանքի հիմքում դրված այն ձևակերպումները, որ Բաբայանը դրդել է Գաբրիելյանին զենք ձեռք բերել, նյութապես շահագրգռելու եղանակով զենքը ձեռք բերելու համար վճարել գումար, չի հաստատվում որևէ փաստական հանգամանքով»։

Փաստաբանը նշեց, որ մեղադրանքը կառուցված է ենթադրությունների հիման վրա, չկան փաստական ապացույցներ:

«Գտնում եմ, որ Սամվել Բաբայանի քրեական օրենսգրքի 38-235 հոդվածի 2-րդ մասով առաջադրված մեղադրանքն անհիմն է, այդ մասով պետք է կայացվի արդարացման դատավճիռ»,- ասաց Քալաշյանը։