Ձեր վստահելի աղբյուրը

Լիբիայում էմիգրանտների՝ ստրկության համար վաճառքի դեպքերի մասին լուրերին է անդրադարձել ՄԱԿ-ի գլխավոր քարտուղար Անտոնիո Գուտերեշը: ՄԱԿ-ի պաշտոնական կայքէջի  հաղորդմամբ, նա նշել է՝  հրապարակումները  վկայում են այն մասին, որ հակամարտությունների զոհերն առավել հաճախ են հայտնվում մարդկանց առևտրով զբաղվողների թակարդում:

Նրանք  ենթարկվում են սեռական շահագործման, նրանց օգտագործում են որպես ստրուկ, վաճառում ներքին օրգանները: Խնդիրը քննարկվել է ՄԱԿ-ի անվտանգության խորհրդում: Գլխավոր քարտուղարը ներկայացրել է այս թեմայով առաջին զեկույցը, որը պատրաստել է խորհրդի հանձնարարությամբ:

Գուտերեշը նշել է, որ այս հանցագործությունները հավասարզոր են մարդկության դեմ իրականացվող և ռազմական հանցագործություններին: Նա կոչ է արել պաշտպանել միգրանտներին ու պատասխանատվության ենթարկել մարդկանց առևտրով զբաղվողներին:

Նա նշել է, որ «Իսլամական պետություն», «Բոկո Հարամ», «Աշ-Շաբաբ» ու այլ ահաբեկչական կազմակերպությունների դաժանությունները սահման չեն ճանաչում:

«Կանայք ու երեխաները՝ ինչպես աղջիկներ, այնպես էլ տղաներ հայտնվում են ստրկության մեջ: Միջազգային հանրությունը պետք է վերջ տա այս չարիքին: Անհրաժեշտ է մեծացնել փախստականներին, միգրանտներին տրամադրվող մարդասիրական օգնությունը, ինչպես նաև օգնել Լիբիայի իշխանություններին հարցը կարգավորելու համար»,-նշել է նա: