Ձեր վստահելի աղբյուրը

Խորհրդարանում այսօր կազմակերպած կլոր-սեղան քննարկման ժամանակ «Հանուն գիտության զարգացման» նախաձեռնության անդամները երկու հիմնական առաջարկ ներկայացրեցին, որոնց տակ որոնց տակ արդեն ստորագրել է 320 հոգի՝ ուսանողներ, դասախոսներ, պրոֆեսորներ, գիտնականներ:

«Քանի որ, իհարկե, օրենքն ընդունվել է, բայց կան շատ բացեր, որոնք պետք է լրացվեն, ակնկալվում է ուսանողների մասնակցությունը և մենք բարձրաձայնում ենք հարյուրավոր գիտնականների, դասախոսների կարծիքը»,- ասաց նախաձեռնության անդամ Սարգիս Բալդարյանը։

Ուսանողների առաջարկի համաձայն՝ պետք է տարկետման իրավունքի տրամադրման ճկուն քաղաքականություն.  «Կառավարությունը պետք է մշակի տարկետման  իրավունքի  տրամադրման ճկուն համակարգ, որը  հնարավարություն կտա ապահովել Գիտության  և կրթության  համակարգի զարգացման անընդհատականությունը, կոռուպցիայի բացառում»։

Դավիթ Պետրոսյանը նշեց, որ մյուս առաջարկը վերաբերում է ՊՆ նոր ծառայությանը:

«Առաջարկվում է, որ  չորս տարվա բակալավրի ընթացքում  բաշխել մեկուկես տարվա ծառայությունը: Սա հնարավորություն է տալիս բանակը բերել բուհ, ոչ թե բուհը տանել բանակ, 2-2 ամիս ծառայությունը բանակում հնարավորություն է տալիս չխախտել ուսանողի կրթության անընդհատությունը, պահպանվում է կապը բանակի հետ, սա հնարավորություն է տալիս, որ բանակի հետ կապված խնդիրների լուծումներ առաջարկվեն, մինչև հիմա բանակի մասին ոչ մի գիտական աշխատանք չի գրվել, սա ցույց է տալիս այս ոլորտի բացը»,-ներկայացրեց նա:

Նախաձեռնության անդամի խոսքով՝ նման կերպ բոլորը կանցնեն զինվորական ծառայության, զինվորը չի կտրվի քաղաքացիական կյանքից, նաև դեմոգրաֆիկ խնդրի լուծում կարող է լինել ինչ-որ չափով: «Չեն լինի արտոնյալներ, բոլոր արական սեռի ներկայացուցիչները կտիրապետեն ռազմական ունակություններին»: