Ձեր վստահելի աղբյուրը

«Անընդհատ պնդվում է, որ պաշպանության ու կրթության ոլորտները փորձում են իրար չհակադրել, բայց փաստացի պաշտպանական ոլորտին առաջնահերթություն է տրվում։ «Պատիվ ունեմ» ծրագրով սպաներին 260 հազար դրամ աշխատավարձ է առաջարկվում, իսկ գիտաշխատողներինը՝ 80 հազար և նույնիսկ ցածր»,- խորհրդարանում կլոր-սեղան քննարկման ժամանակ նշեց «Հանուն գիտության զարգացման» նախաձեռնության անդամ Դավիթ Պետրոսյանը։

«Անգամ մեր քննարկման ժամանակ պաշտպանության նախարարը հարցրեց մեր տղաներից մեկին, թե ինչքան գումար է ստանում, որ գիտությամբ է զբաղվում։ Նա պատասխանեց՝ 40 հազար, իսկ նախարարն ասաց՝ մենք ձեզ առաջարկում ենք 260 հազար, այսինքն՝ ստացվում է այնպես, որ մենք սոցիալական գրավչությունն ապահովելով՝ մարդկանց այլ դաշտ ենք տեղափոխում» ,- նշեց Դավիթ Պետրոսյանը։

ՀՀ պաշտպանության փոխնախարար Արտակ Զաքարյանը անդրադառնալով նշվածին՝ ասաց, որ այսօր ԶՈւ-ն և պաշտպանության համակարգը կարիք ունեն գիտական պոտենցիալի։

«ՀՀ պաշտպանության և կրթության նախարարները շատ են քննարկել՝ ինչպես անել, որ մեկը մյուսի հաշվին չլինի, մինչդեռ օրենքում հավասարության սկզբունքը դնելուց ուշադրություն է դարձվել այն հարցին, որ տարկետման իրավունքի նախկին ձևով պահպանման պայմաններում ըստ էության գիտությունը չի շահել։ Արդյունքում ստացվում էր, որ մարդիկ գնում են գիտական ճանապարհով, կեսից, առանց գիտական արդյունք տալու, հրաժարվում են գիտությունից ու նաև հնարավորություն էին ստանում չծառայել», - նշեց փոխնախարարը։

Նախաձեռնության անդամ Հայկ Զաքարյանն դիմելով ԿԳ նախարար Լևոն Մկրտչյանին՝ հարցրեց,. «Սխալ է մեկնաբանվում նաև այն, որ 18 տարեկանից հետո, ծառայությունից հետո գալիս են կրթությունը շարունակելու, բայց ուսման անընդհատությունը խախտվում է։ Ասպիրանտուրան ավարտածների և գիտության մեջ մնացածների քանի՞ տոկոսն է, որ ծառայել է բանակում»:

Լևոն Մկրտչյանը պատասխանեց, որ այս թվերը հետագայում կարող են ներկայացնել, բայց հավելեց, որ ասպիրանտուրան շատերն ավարտում են, բայց չեն գնում թեկնածուական թեզի պաշտպանությանը. «Հիմա մտածում ենք, թե ինչ կարելի է անել, որպեսզի ոչ միայն հումանիտար ուղղությունը գրավիչ լինի, այս խնդիրը ևս առկա է: Օրինակ՝ մտածում ենք ֆիզմաթում տեղերի 80 տոկոսն անվճար դարձնեն, որպեսզի գրավիչ դարձնեն երիտասարդների համար»։

Հայկ Զաքարյանն արձագանքեց, որ եթե ավելացվի անվճար տեղերի քանակը, ողջունելի կլինի, իրենց մեկնաբանությունն այդ թվերի վերաբերյալ այն է, որ տղաների մեծամասնությունը գիտության մեջ մնացածների չծառայածներն են, և եթե օրենքն ընդունվի, ապա հարցականի տակ կդրվի այդ մասսայի գոյությունը:

Պաշտպանության փոխնախարար Արտակ Զաքարյանն էլ արձագանքեց, որ խնդիրների լուծման բոլոր մեխանիզմները տեղափոխում են կառավարության որոշումների դաշտ, որպեսզի հետագայում, երբ տեսնեն, որ որևէ խնդիր կա, կառավարությունը դա հեշտորեն որոշումների միջոցով փոխի:

«Օրենքը ընդհանուր հավասարության սկզբունքը տվել է, իր գործն արել է։ Հիմա մենք ձեզ հետ շատ երկար պիտի քննարկենք: «Պատիվ ունեմ» ծրագրի շրջանակներում երիտասարդն ավարտելու ժամանակ, նաև սպայական դասընթացներն անցնելու ժամանակ հնարավորություն է ունենում, ՊՆ-ի շահագրգռվածությունն է լինում ամեն ինչ անել, որ երիտասարդը ծառայությունն անցնի որպես գիտնական: Ունենալով կարիք գիտության ոլորտում՝ պատրաստ ենք խթան հանդիսանալ: Մինչև հիմա է օրենքը խոչընդոտել, քանի որ ընդհանուր խաղի կանոն է եղել, որ ով չի ուզեցել գնալ բանակ, չի գնացել գիտության հովանու անվան տակ, հիմա առաջակում ենք, որ լինեն կարգեր, մեխանիզմներ, որ եթե այս երիտասարդն արժանի է, նրան զորակոչել այլ պայմաններով, որ նա կարողանա գնալ տուն, գալ, այս ամենը օրենքով չէ, որ պետք է արվի»,- մանրամասնեց փոխնախարարը: