Ձեր վստահելի աղբյուրը

«Հակասություն չկա բացարձակապես բանակային ծառայության և գիտության մեջ, այս խնդիրն արհեստական է և խոսքը գնում է անընդհատությունը պահպանելու անհրաժեշտության մասին»,- ԱԺ-ում «Հանուն գիտության զարգացման» նախաձեռնության անդամների հետ ընթացող կլոր սեղան-քննարկման ժամանակ ասաց հիմնական զեկուցող ՀՀ ԿԳ նախարար Լևոն Մկրտչյանը։

Նա նշեց, որ անձամբ դասադուլի ժամանակ չի այցելել համալսարան՝ հարգելով երիտասարդներին, քանի որ գործընթացը էմոցիանալ փուլ էր անցնում, բայց փորձել է հանդիպումների ժամանակ հասկանալ՝ ինչ հիմնական խնդիրներ կան, որոնք լուծելու կարիք ունեն։

«Ծառայությունը չի ընդհատում նրա գիտելիք ստանալու հնարավորությունը։ Քանի որ կա «Պատիվ ունեմ» ծրագիրը, որը հնարավորություն է տալիս երիտասարդների մեծ մասին անցնել բակալավրիատի կրթություն և դրանից հետո որպես սպա ծառայել: Այս նույն սկզբունքի մի տարատեսակ երևի կարիք ունենք բակալավրիատից դեպի մագիստրատուրա ունենալ։ Այստեղ ՊՆ հետ մեր աշխատանքը հետևյալն է՝ նույն ձևով առաջարկել, որ այն երիտասարդները, որոնք ավարտում են բակալավրիատը, գնան սպայական աստիճանի, մեկ տարի սպայական աստիճանն իրականացնելուց հետո և երկու տարի իբրև սպա աշխատալու ընթացքում հնարավորություն ունենան իրենց մասնագիտական հմտությունները չկորցնել ու զբաղվեն հատուկ կուրսերով։ Լուծումներն այստեղ կարող են լինել»,- ասաց Մկրտչյանը։

Նախարարի խոսքով՝ ավելի հեշտ լուծելի է թվում մագիստրատուրայից դեպի ասպիրանտուրան, քանի որ գործ ունեն արդեն կողմնորոշված գիտնականի հետ։

«Այս բոլոր հարցերն, ըստ էության, ենթաօրենսդրական դաշտի մեջ հնարավոր լուծումների տիրույթում են։ Պատկերացնում եմ, որ ձևավորվի լուրջ հանձնաժողով, որի մեջ կներառվեն ԿԳՆ, ՊՆ, գիտական հանրույթի և երիտասարդների ներկայացուցիչները, որոնք արդեն  ավելի պրոֆեսիոնալ մասնագիտություն առ մասնագիտություն կարող է ուսումնասիրել, հասկանալ յուրաքանչյուր մասնագիտության համար ինչ խնդիր կա»,-ասաց նա:

ԿԳ նախարարը հայտնեց, որ 2007-2016 թվականներին Հայաստանում պաշտպանվել են 445 դոկտորական, 5032 թեկնածուական ատենախոսություններ։  445 դոկտորներից միայն 191-ն է մնացել գիտության ոլորտում կամ 42.9 տոկոսը, իսկ թեկնածուներից  646-ը՝ կամ 12.8 տոկոսը: