Ձեր վստահելի աղբյուրը

«Իրականում սպասվում էր, որ ՀՀ-ԵՄ նոր համաձայնագիրը կլիներ 10-20 էջի սահմաններում, բայց բավականին ծավալուն է, քանի որ լուրջ բարեփոխումներ է առաջարկում, իսկ թե կիրականացվե՞ն դրանք, կախված է մեզանից, ինչպես նաև քաղաքացիական հասարակությունից»,- «Բրյուսելի գագաթաժողովից առաջ. ԱլԳ և ՀՀ-ԵՄ նոր շրջանակային համաձայնագիր» խորագրով քննարկման ընթացքում ասաց «Համախմբում» կուսակցության անդամ Էլինար Վարդանյանը:

Նրա խոսքով՝ հասարակությունը բավական իներտ է դարձել Հայաստանի և Եվրամիության միջև նոյեմբերի 24-ին ստորագրվելիք համագործակցության փաստաթղթի վերաբերյալ։

Նրա խոսքով՝ հասարակությանն անվտանգությունից բացի հետաքրքրում է նաև մի շարք սոցիալական հարցեր։

Առանձնացնելով իր համար կարևոր հարցերը՝  Էլինար Վարդանյանը հատկապես նշեց նույն սոցիալական խնդիրներն ու մարդու իրավունքների պաշտպանության ամրապնդմանն ուղղված քայլերը:

«Համաձայնագրում կարևոր ձևակերպում կան նաև աշխատանքի միջազգային կազմակերպության կողմից ընդունված արժանապատիվ աշխատանքի եզրույթին։ Մենք իրականում արժանապատիվ աշխատանքի խնդիր ունենք։ Հայաստանում աշխատողների իրավունքների պաշտպանության լրջագույն խնդիր կա, որոնց գոնե ընտրությունից ընտրություն առնչվում ենք: Եթե իրականում կիրառվեն այն ստանդարտները, որոնք նախատեսված են այս բանաձևերով՝ հնարավորություն կտրվի հիմք դնելու արժանապատիվ աշխատանք ունենալուն»,- ասաց նա։

«Համախմբում» կուսակցության անդամը շեշտեց, որ համաձայնագրի մեջ տեղ գտած կետերի կիրառումը կախված է նաև հասարակության պահանջատիրությունից։