Ձեր վստահելի աղբյուրը

«Վերջին մի քանի օրում Սոչիում բարձր մակարդակի հանդիպումներով, որոնց  առանցքային թեման Սիրիան է, փաստացի ամրագրվում է սիրիական հակամարտության որակապես նոր փուլի անցման մեկնարկը»,- այսօր  լրագրողների հետ հանդիպմանը նման կարծիք հայտնեց արաբագետ Արմեն Պետրոսյանը:

Նրա խոսքով՝ ավարտվում է «Իսլամական պետության» դեմ հակաահաբեկչական պայքարը և նախապատրաստվում է հակամարտության քաղաքական փուլը:

«Ռուսաստանի, Թուրքիայի և Իրանի նախագահների  հանդիպումն ավելի արարողակարգային և խորհրդանշանական էր, որը նպատակ ուներ ի ցույց դնել աշխարհին այս երեք հիմնական դերակատարների մասնակցությամբ ձեռք բերված հաջողությունները, մասնավորապես ԻՊ-ի դեմ պայքարը։ Հանդիպման ավարտի ամփոփիչ ասուլիսին նշվեց, որ կողմերը չեն դադարեցնում հակամարտությունը կարգավորելուն ուղղված ջանքերը, դրանք գործադրվելու են քաղաքական ձևաչափի շրջանակներում»,- մանրամասնեց արաբագետը։

Արմեն Պետրոսյանի խոսքով՝  ձևաչափը կրում է «Սիրիական ժողովուրդների երկխոսության կոնգրես» անունը. «Այս ձևաչափի շրջանակներում, որի առաջին հանդիպում նախատեսված է դեկտեմբերի սկզբներին, նախատեսվում է ինչպես հակամարտության քաղաքական տարաբնույթ ուժերին, դաշինքներին, այնպես էլ էթնիկ ցեղային միավորումներին  մասնակից դարձնել»։

Ինչ վերաբերում է ձևաչափի և  հակամարտության նոր փուլի հաջողություններին, արաբագետն ասաց, որ  հակաահաբեկչական պայքարի ավարտով հակամարտությունը բնավ էլ չի ավարտվում և ընդամենը վերադառնում ենք 2013-ի իրողություններին, երբ չկար ԻՊ-ն և չկար ահաբեկչական պայքարը:

«Մի կարևոր լուրջ ձեռքբերում կա՝ այն է, որ  հակաասադական ճամբարում տեղի են ունեցել որոշակի կարևոր դերակատարությունների տեղափոխություն՝ Քաթարը և Թուրքիան, որոնք հակամարտության սկզբին աջակցում էին սիրական ընդդիմությանը։ Սիրիական հակամարտության վերջնական հանգուցալուծումը հնարավոր է, երբ բոլոր արտաքին դերակատարները կունենան կամք՝ հաղթահարելու ճգնաժամը և դուրս գալու Սիրիայից՝ ինչի նախադրյալները չկան»,- ասաց նա և հավելեց, թե կոնկրետ Իրանը չի պատրաստվում զիջել դիրքերը:

Ասուլիսին ներկա իրանագետ Արտյոմ Տոնոյանը հավելեց, որ Իրանն ուներ գերակա ազդեցություն Սիրիայում, ինչը բարդ է լինելու պահպանել հակամարտության պայմանական ավարտից հետո:

«Ամենաբարձր մակարդակի  հայտարարություններում արդեն նշվում են, թե այն պետությունները, որոնք կիսում են հաղթանակի փառքը՝ ի սկզբանե այլ դերակատարում են ունեցել հակամարտության մեջ: Նշվում է Թուրքիայի անունը, այսինքն՝ Իրանը չի պատրաստվում հավասարը հավասարի հետ կիսել Թուրքիայի հետ»,-նշեց իրանագետը:

Իրանագետի կարծիքով՝ ճգնաժամը շարունակվելու է և բացառված չէ, որ այլ ուժեր կշարունակեն հրահրել։

«Հակամարտությունը չի ավարտվել և սրա մասին խոսեց նաև ԻԻՀ  նախագահ Ռոհանին՝ Սոչի մեկնելու պահին՝ ասելով, որ իրենք պայմանականորեն են համարում ավարտված, գործ ունեն ԻՊ-ի դադարի հետ, ոչ առհասարակ ահաբեկչության դեմ պայքարի դադարեցմանը»,- ասաց Արտյոմ Տոնոյանը։