Ձեր վստահելի աղբյուրը

«Հայաստանում թանկացումները, սովորաբար, սեզոնային բնույթ են կրում, բայց որոշ ապրանքների գծով՝ հատկապես կաթնամթերքի ու մսամթերքի, մենք ունեցանք ֆորս-մաժոր՝ արտակարգ իրավիճակ, ինչը որոշակի պատճառներ ունի», - այս մասին այսօր լրագրողների հետ հանդիպման ժամանակ ասաց տնտեսագետ Ատոմ Մարգարյանը:

Մասնավորապես, ըստ նրա,  վերջին տարիներին գյուղատնտեսությունը՝ հատկապես անասնապահությունը և բուսաբուծությունը, տխուր վիճակում են, ինչը, ըստ տնտեսագետի, պարարտ միջավայր է ստեղծել սպեկուլյատիվ որոշակի գործարքների համար, այսինքն, այնպիսի գործարքների, որոնք ոմանց համար գերշահույթ կապահովեն։

Անդրադառնալով կաթնամթերքի թանկացումներին՝  Ատոմ Մարգարյանն ասաց, որ դրանց վրա իրենց ազդեցությունն են ունեցել 2015 և 2016 թվականների գյուղատնտեսական անբարենպաստ տարիները: Նա նաև ասաց, որ Ազգային վիճակագրական ծառայությունը խոշորամասշտաբ ծրագիր է իրականացրել և հրապարակել է  գյուղատնտեսության համատարած հաշվառման վերաբերյալ տվյալներ, որի համաձայն՝ շատ թվեր ճշգրտվել են: 

«Այսինքն՝ եթե գյուղապետերը հավելագրում էին 20 հազար տոննա ցորեն, բայց, իրականում, արտադրվել էր 12 հազար տոննա, բնականաբար, այս համակարգի պայմաններում թվերը ճիշտ չէին և հիմա դրանք ճշգրտվում են»,- ասաց Ատոմ Մարգարյանը:

Ինչ վերաբերում է կարագին, ապա, ըստ տնտեսագետի, դրա մեծ մասը՝ մինչև 70 տոկոսը, ներկրվում է Ավստրալիայից, Նոր Զելանդիայից,  Գերմանիայից։ Սակայն հիմնականում ներկրվում է «Նորզելանդական» կարագը, որի արտադրության պայմաններն այնտեղ էլ են թանկացել, ուստի բնական է, որ ներկրողները ստիպված են թանկացնել։

Այդուհանդերձ,  տնտեսագետը կարծում է, որ այստեղ կա սպեկուլյատիվ տարր՝ բարձրացնել ավելի, քան պետք էր բարձրացնել։ «Այսինքն, ըստ էության, օգտվելով և վերահսկողության թուլությունից, ինչպես նաև  գործընկերների հետ պայմանավորվածությունից, խմբային որոշումների արդյունքում թանկացել է։ Օլիգոպոլ դրսևորումներ կան մեր բիզնես դաշտում։ Այնպես որ, այո, հնարավոր է, որ այդ թանկացումների որոշակի մասը արհեստական հրահրված լինեն», - ընդգծեց նա:

Խոսելով ձվի թանկացման մասին՝ Ատոմ Մարգարյանը նշեց, որ դրա վրա ինչ-որ չափով ազդել է նաև Եվրասիական տնտեսական միության անդամակցության գործոնը, որը հնարավորություն է տալիս շատ էժան թռչնամիս ներկրել Հայաստան։ «Դա հարվածել է մեր ներքին արտադրողներին։ Այս պայմաններում ներքին արտադրությունը կրճատվել է, բնական է, եթե չկա հավ, չի էլ կարող լինել ձու: Ըստ էության, կարող է առաջարկի հետևանք լինել, թեև դա դեռ պետք է ՏՄՊՊՀ-ն ուսումնասիրի ու պետք է լավ անի, քանի որ տարեվերջ է: Այստեղ սեզոնայնության գործոնը սկսում է աշխատել: Մարդիկ սկսում են նախապատրաստել գնորդներին առաջիկա գնային վերընթացներին, բայց մի քիչ ավելի վաղ են սկսել»,- ասաց տնտեսագետը:

Ատոմ Մարգարյանը նշեց նաև, որ նախորդ օրերին խանութների մի զգալի մասից հավկիթն անհետացել է, և կարծես, դրանով ասում են՝ դեֆիցիտ կա, դրա համար էլ գինը բարձրացել է: «Իրականում կարգավորող մարմինները պետք է հետևեն այս ամենին և եթե պետք է, ապա համապատասխան սանկցիաներ կիրառեն, քանի որ գնային բարձրացումները բերում են որոշակի գերշահույթների»,- եզրափակելով խոսքն՝ ասաց տնտեսագետը: