Ձեր վստահելի աղբյուրը

Հայաստանյան շուկայում հայտնաբերված խաղալիքների մեծամասնությունը սերտիֆիկացված չէ: Այս մասին նոյեմբերի 24-ին լրագրողների հետ զրույցում նշեց «Իրազեկ և պաշտպանված սպառող» ՀԿ նախագահ Բաբկեն Պիպոյանը: Նա նշեց, որ դաշտում կան խնդիրներ, որոնք հայտնաբերվել են, և հիմա փորձում են գտնել դրանց լուծման մեխանիզմները:

«Մոնիթորինգն իրականացվել է հենց խաղալիքների ցանցում: Մենք շատ դեպքերում նկատել ենք, որ սերտիֆիկատ չկա, դա խնդիր է: Մոնիթորինգ իրականացվում է բոլորի դեպքում, բայց մենք գիտենք, որ մեզ մոտ հիմնականը ներմուծված ապրանքներն են, ոչ թե տեղական արտադրանքը: Ըստ էության՝ դա չի նշանակում, որ խաղի կանոնները պետք է հավասար չլինեն՝ թե տեղական արտադրողի, թե ներմուծողի համար»,- ասաց նա:

Պիպոյանը նշեց, որ շղթայական աշխատանք է. իրենք արտադրողին կամ ներմուծողին ասում են՝ սերտիֆիկացրու ապրանքդ, սերտիֆիկատը երաշխավորում է անվտանգությունը, և իրենք վերահսկում են ընդամենը սերտիֆիկատը, այսինքն՝ պետությունը գումար չի ծախսում, բայց կարողանում է վերահսկողություն իրականացնել: Սա, ըստ Պիպոյանի, կարող էր լավագույն մեխանիզմներից մեկը լիներ, եթե ոլորտում խնդիր չլիներ. Հայաստանում այսօր սերտիֆիկացման 50 ցուցանիշից միայն 30-ն է կատարվում, ոչ թե՝ ցանկության բացակայության, այլ այն պատճառով, որ մնացած 20-ը չեն կարողանում անել:

«Խաղալիքների գերակշռող մեծամասնությունը սերտիֆիկացված չէ, ավելին, մեզ մոտ գալիս են սերտիֆիկատներ՝ դրսից, որոնք թվացյալ են, իրականում ստուգում անցած չեն ու մակնշված չեն»,- ասաց նա՝ հավելելով, որ շատ խաղալիքներ Ռուսաստանում իրացնելու համար են նախատեսված, բայց գալիս են այստեղ:

Պիպոյանը տեղեկացրեց, որ իրենք հանդիպել են վերավաճառողների հետ, նրանք ասում են՝ ումից գնում եք, նրանց մոտ գնացեք, վերջիններս էլ ասում են՝ թող վերավաճառողները սերտիֆիկատի պատճեն ուզեն:

ՀԿ նախագահը նշեց, որ իրենք նաև փորձում են մարդկանց իրազեկել, որ մարդիկ խաղի կանոններն իմանան: Շուկայի վերահսկողության տեսչական ծառայության պետ Լևոն Խալիկյանը նշեց, որ իրենց և հասարակական կազմակերպությունների գործն ընդհանուր է՝ իրենց խնդիրն անվտանգ շուկա ապահովելն է:

«Խելամիտ առաջարկների դեպքում փորձում ենք, ՀԿ-ների առաջարկները հիմք ընդունելով, տեսչական մարմնում փոփոխություններ անել: Մեր տեսչական մարմնում ընդգրկել ենք առավել ակտիվ ՀԿ-ներին, ամեն եռամսյակ իրենցից վերցնում ենք այն խնդիրները, որ բարձրացնում են, երեք ամսից հաշվետու լինում՝ ինչ ենք արել»,- ասաց նա:

Խալիկյանը տեղեկացրեց, որ սերտիֆիկատ տրամադրվում է այն խաղալիքներին, որոնք անցել են բոլոր փորձարկումները ու համապատասխանում են ազգային չափանիշներին, թեպետ կան ոչ բարեխիղճ տնտեսվարողներ, ովքեր փորձում են խաղալիքն իրացնել առանց սերտիֆիկատի, սակայն նրանք մշտապես տեսչական մարմնի ուշադրության կենտրոնում են:

«Դա բարդ չէ, ուղղակի փորձում ենք մշակույթ ձևավորել, որ սպառողը սերտիֆիկատ պահանջի: Բոլոր երկրներում այսօր սերտիֆիկացման գործընթացը հեշտացվել է, քանի որ ԵԱՏՄ անդամ երկրներում գրանցված բոլոր սերտիֆիկացման մարմիններում սերտիֆիկացումը մեզ համար հիմք է հանդիսանում»,- նշեց նա: