Ձեր վստահելի աղբյուրը

ՀՀ-ԵՄ Համապարփակ և ընդլայնված գործընկերության համաձայնագիրն, ըստ էության,  փոխլրացնում է այն հարաբերությունները, որոնք տարիներ շարունակ զարգանում են Եվրամիության և Հայաստանի միջև: Այս մասին Panorama.am-ի թղթակցի հետ զրույցում ասաց քաղաքագետ Ալեքսանդր Մարկարովը:

«Այսպիսով, ստեղծվում է նոր ձևաչափ՝ Հայաստան-ԵՄ փոխհարաբերությունների համար»,-նշեց քաղաքագետը:

Նրա խոսքերով՝ պայմանագիրը պետք է ստանա ավելի մանրամասն ծրագրային գործողությունների բնույթ: «Մինչև 2020 թվականը մենք կտեսնենք, որ ՀՀ-ԵՄ փոխադարձ համագործակցությունն առավել կզարգանա ու կխորանա»,- ընդգծեց Ալեքսանդր Մարկարովը՝ հավելելով, որ համաձայնագիրն իր բովանդակությամբ ենթադրում է Հայաստանի ու Եվրամիության միջև բազմաբովանդակ համագործակցություն տարբեր բնագավառներում:

Անդրադառնալով Արևելյան գործընկերության  հռչակագրի շրջանակում ընդունված դրույթներին, որոնք վերաբերում են Ղարաբաղյան հակամարտության խնդրին, քաղաքագետն ասաց, որ շեշտադրվում է այն հանգամանքը, որ միջազգային հանրության համար ընդունելի է գոյություն ունեցող այն ձևաչափը, որն իրականացվում է Մինսկի խմբի համանախագահողների կողմից:

Ըստ նրա՝ երկրորդ կարևոր հանգամանք այն է, Ղարաբաղյան հակամարտության կարգավորման գործընթացի համար որպես հիմք՝ պետք է լինեն միջազգային իրավունքի մեջ գոյություն ունեցող երեք սկզբունքները: