Ձեր վստահելի աղբյուրը

ՀՀ-ԵՄ Համապարփակ և ընդլայնված գործընկերության համաձայնագիրը  լրջագույն մի փաստաթուղթ է, որն առաջիկայում կանխորոշելու է բազմաթիվ ոլորտներում մեր առաջընթացը։ Այս մասին այսօր լրագրողների հետ հանդիպման ժամանակ ասաց ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը:

Նրա խոսքով՝  այն, ինչ տեղի ունեցավ երեկ Բրյուսելում, վաղուց սպասված մի քայլ էր, որին Հայաստանը գնում էր տարիներ ի վեր. «Համաձայնագրի ստորագրումը կայացավ իշխանությունների հետևողական աշխատանքի և ջանքերի շնորհիվ»:

Գագիկ Մինասյանը նշեց, որ համաձայնագիրն իր հետ բերում է նոր հնարավորություններ Հայաստանի ներքին զարգացումների համար՝ դրանք մարդու իրավունքներն են, իրավական դաշտի ներդաշնակեցումն է Արևմտյան չափանիշներին և այլն։ «Այս համաձայնագիրը մեզ հնարավորություն է տալիս այն պլանավորած բարեփոխումներն առաջիկայում իրականացնել շատ ավելի ինտենսիվ և արագ տեմպերով՝ օգտվելով նաև մեր Արևմտյան գործընկերների օժանդակությունից»,- ընդգծեց պատգամավորը։

Խոսելով ՀՀ-ԵՄ Համապարփակ և ընդլայնված գործընկերության համաձայնագրում  Լեռնային Ղարաբաղի հակամարտությանը վերաբերող հատվածի մասին՝ Գագիկ Մինասյանն ասաց, որ հստակ արձանագրվում է՝ կողմերը սատարում  են ԵԱՀԿ Մինսկի խմբի գործընթացին, և որ ԼՂ խնդիրը պետք է կարգավորվի Հելսինկյան ակտերի երեք հիմնարար դրույթների հիման վրա՝ ուժի սպառնալիքի չկիրառում, տարածքային ամբողջականություն և ժողովուրդների ինքնորոշման իրավունք։

«Չափազանց կարևոր է այն, որ այնտեղ արձանագրված է շատ կարևոր մի փաստ՝  նրանք հենվում են ՄԱԿ-ի կանոնադրության, Հելսինկյան եզրափակիչ ակտում ամրագրված նպատակների և սկզբունքների հիման վրա: ՄԱԿ-ի հիմնարար փաստաթուղթն արձանագրում է, որ ազգերի ինքնորոշումը նպատակ է, իսկ տարածքային ամբողջականությունը ընդամենը միջոց։ Այսինքն՝ եթե այս երկու սկզբունքները Հելսինկյան եզրափակիչ ակտում նույն մակարդակի վրա են գտնվում, ապա ՄԱԿ-ի համապատասխան փաստաթղթում ինքնորոշումը ավելի բարձր մակարդակի վրա է, քան տարածքային ամբողջականությունը»,- նշեց Գագիկ Մինասյանը՝ հավելելով, որ համաձայնագիրը պետք է վավերացվի ԵՄ 24 անդամ երկրների կողմից, հետևաբար, այս տեսակետը կիսելու են այդ երկրները։

Նա նաև ասաց, որ Արևելյան գործընկերության գագաթաժողովի ընթացքում ընդունվել է հռչակագիր, որի հետ կապված Հայաստանն ուներ մտավախություններ, մասնավորապես, ադրբեջանական լոբբին,  Ադրբեջանին հարիր գործելաոճով կարող էր ստեղծել մի իրավիճակ, որ Հայաստանը վերապահումով ստորագրեր այդ փաստաթուղթը: Սակայն, ըստ Գագիկ Մինասյանի, արտաքին գերատեսչության և անձամբ ՀՀ Նախագահի լրջագույն աշխատանքի և ջանքերի շնորհիվ հնարավոր եղավ փաստաթուղթը ներկայացնել և վավերացնել այն տեսքով, որը որևէ շանս չի տալիս Ադրբեջանին։

«Որն էր այստեղ խնդիրը. այնտեղ արձանագրված է, որ ԵՄ-ն սատարում է իր Արևելյան գործընկերության գործընկերների տարածքային ամբողջականությանը և առկա խնդիրները կարող են կարգավորվել ՄԱԿ-ի կանոնադրությամբ, Հելսինկյան եզրaփակիչ ակտի և ԵԱՀԿ-ի Փարիզի խարտիայի հիման վրա: Մենք բազմիցս ասել ենք, որ ԼՂ խնդիրը Ադրբեջանի տարածքային ամբողջականության հետ կապ չունի, քանի որ  Արցախը երբեք չի եղել անկախ Ադրբեջանի մաս։ Եվ Ադրբեջանը, և Արցախը եղել են ԽՍՀՄ մաս, որը քանդվել է և այդ պետությունից առանձնացել են բազմաթիվ պետություններ, այդ թվում՝ ԼՂՀ-ն և Ադրբեջանը»,- նշեց պատգամավորը:

Ըստ նրա՝  այս ամենը  թույլ է տալիս կանխատեսել, որ առաջիկայում ԼՂ բանակցային գործընթացը կգնա հետևյալ սցենարով՝ Ադրբեջանը ամեն ինչ կանի, որպեսզի կարողանա հետ վերադարձնել այն դիրքերը, որոնք կարծես թե ուներ, սակայն վերջին շրջանում և ՌԴ-ի, և ԵՄ-ի կողմից հստակ արձանագրվեց այն փաստը, որ այդ պատկերացումները առ ոչինչ են: Մյուս կողմից, ըստ Գագիկ Մինասյանի, Հայաստանը պետք է այնպես անի, որ այս ձեռքբերումներն ամրապնդվեն և առաջին հերթին կյանքի կոչվեն այն համաձայնագրի դրույթները, որոնք ստորագրվել են Վիեննայում և Սակտ Պետերբուրգում: