Ձեր վստահելի աղբյուրը

«Չե՞ք կարծում, որ չափից շատ ենք տուրք տալիս օտարերկրյա ուղղակի ներդրումներ արտահայտությանը։ Ինչու՞ ենք մոռանում, որ մենք պետք է անենք ներքին ենրդրումներ»,- ԱԺ-ում ԵԱՏՄ-ից դուրս գալու վերաբերյալ «Ելքի» նախագծի վերաբերյալ խորհրդարանական լսումների ժամանակ ասաց տնտեսագետ Թաթուլ Մանասերյանը։

Տնտեսագետի կարծիքով՝ Հայաստանի կառավարությունը պետք է թիրախավորի ներքին ներդրումները և այնպես անի, որ օտարերկրացին տեսնի, թե ինչպիսի վստահելի գրավիչ դաշտ է, որ ինքն էլ մասնակից դռնա։

«Ներդրումները չէին կարող չնվազել, որովհետև մենք ինքներս չենք աշխատել և մեր խնդիրները լուծելու շատ թույլ պատրաստակամություն ենք դրսևորել: Ո՞վ ասաց, որ ԵԱՏՄ-ում խնդիր չկա, և որևէ միություն կայացել է: Եղել է ժամանակ՝ ՀՀ-ից արտահանման կեսից ավելին գնացել է ԵՄ, շատ էինք ուրախանում, ես ասում էի՝ մի քիչ զուսպ վերաբերվեք որովհետև կախվածություն էր ստեղծվել: Ես շատ ուրախ եմ, որ մենք ունենք «և-և»-ի հնարավորությունը»,-ասաց նա:

Մանասերյանն ասաց, թե պատկերացնենք մի այսպիսի իրավիճակ՝ «Ելքի» առաջարկն ընդունվում է, դուրս ենք գալիս ԵԱՏՄ-ից՝ ի՞նչ հարցեր են լուծվում, որտե՞ղ ենք հայտնվում. «Կարծու՞մ եք մի քանի օր առաջ Լավրովն իզուր ասաց, որ ողջունում են Ադրբեջանի անդամակցությունը ԵԱՏՄ-ում: Չկասկածեք, եթե Հայաստանը դուրս եկավ, Ադրբեջանը կդառնա ԵԱՏՄ անդամ: Մենք ուզո՞ւմ ենք մեր դեմ տրամադրել նոր թշնամիներ: Բացի այդ չի կարելի ասել, որ այն, ինչ տեղի է ունենում Ռուսաստանում, Հայաստանում էլ պիտի լինի: Մեզ հուշում էին տնտեսական անկում 2015 թ.-ին, բայց չեղավ»,-ասաց նա։

Թաթուլ Մանասերյանն ընդգծեց, որ ազգային օրակարգի ձևավորումը Հայաստանին կօգնի ճիշտ օգտագործել այն հնարավորությունները,որոնք ընձեռնում են այս կամ այն միությունները։