Ձեր վստահելի աղբյուրը

«Բաբայանին ներկայացնել կրիմինալ ձեր խնդիրն է»,-ասաց ԼՂՀ ՊԲ նախկին հրամանատար Սամվել Բաբայանը՝ այսօրվա դատական նիստում դիմելով դատավորին:

Նա իր դեմ հարուցված քրեական գործը պատվիրված որակեց:

«Շատ լավ գիտեմ, ոտերը որտեղից է, ականջները՝ որտեղից: Ուղղակի ես ասում եմ՝ կարելի է օրենքը թեթև շրջանցել, բայց չի կարելի ակն տրորել, թքել վրեն: Չի կարելի ուղղակի, եթե ուզում եք պետություն դառնալ: Բաբականը մի տարի ավել նստի, մի տարի պակաս նստի, դուք հարց չեք լուծելու: Ես ինձ մեղավոր չեմ ճանաչում, ոչ մի դեպքում»,-հայտարարեց նա:

Ամբաստանյալներից Սանասար Գաբրիելյանը գործը շինծու որակեց, դատարանից խնդրեց լինել ճիշտ ու արդար,  ասաց՝ մարդկային խիղճ գոյություն ունի, «որ դրսում իրար տեսնենք, ասեմ, ես քու ցավը տանեմ, այ ըսենց լավ դատավոր ես, լավ մեղադրող ես, ոչ թե ասենք, այ ցավդ տանեմ, էս ո՞վ էր»:

Ամբաստյալ Անդրանիկ Քոչարյանն ասաց՝ մեղադրանքը չի ընդունում ու չի էլ ընդունելու. «Ուղղակի ես ամաչում եմ իմ ընտանիքից, իմ որդիներից, իմ հարազատներից, պարոն նախագահող, Ձեզանից, մեղադրող կողմից, ինչպես նաև դահլիճում նստածներից: Ես հավատում եմ, որ դուք կկայացնեք ճիշտ և արդար որոշում, այսքանը»:

Ամբաստանյալ Կարեն Քոչարյանը դատարանին կոչ արեց դատական ակտ կայացնելիս օրենքից բացի, առաջնորդվել մարդկային խղճով:

Արմեն Պողոսյանն էլ հայտարարեց, որ իրեն մեղավոր չի ճանաչում:

Նշենք, որ  դատարանը հեռացավ խորհրդակցական սենյակ։ Գործով վճիռը կհրապարակվի նոյեմբերի 28-ին՝ ժամը 11:00-ին։