Ձեր վստահելի աղբյուրը

Հայաստանի զարգացման հիմնադրամը հաիտնում է, թե՝  աշխարհի 4 առաջատար ընկերություններից ստացել է «Նոյ» ազգագրական թաղամասի ճարտարապետական և բիզնես պլանավորման նախագծերը և ներկայացնում է մասնագետների քննարկմանը։

Հիմնադրամից հայտնում են նաև, որ  4 նախագծերի էլեկտրոնային տարբերակները և հարցաթերթիկը հասանելի են հետևյալ հղումով։ Ազգագրագետների, ճարտարապետների, տուրիզմի մասնագետների ու հանրության այլ անդամների ուղարկած կարծիքները խմբավորելուց, մշակելուց հետո կներկայացվեն ներդրողներին և կընտրվի հաղթող ընկերությունը։ 

ՀԶՀ հայտարարած մրցույթին մասնակցել և աշխատանք են ներկայացրել ամերիկյան «AECOM», բրիտանական «ARUP», լիբանանյան «ERGA»  և ամերիկյան «SWA» ընկերությունները, որոնք զբոսաշրջային ուղղությունների ծրագրման 30-60 տարվա հաջող փորձ ունեն աշխարհով մեկ։

Հայաստանի զարգացման հիմնադրամը «մրցույթի մասնակիցների առջև խնդիր էր դրել ստեղծել Հայաստանի տարբեր տարածաշրջանների ճարտարապետական, խոհանոցային, արվեստի, արհեստների լավագույն մշակույթը, սովորույթներն ու ավանդույթները ներկայացնող թաղամասի հայեցակարգ»։

«Մասշտաբային ներդրումային ծրագրով Երևանում կառուցվելիք թաղամասը կմեծացնի Հայաստանի զբոսաշրջային բազմազանությունն ու գրավչությունը։ Ծրագրի բիզնես տրամաբանությամբ, Երևան այցելող զբոսաշրջիկը թաղամասում, որպես այցեքարտ, ծանոթանալով, ասենք, Գորիսի կամ Լոռվա կոլորիտին, կշահագրգռվի այցելել նաև մարզեր ու ավելին տեսնել»,- նշել է Հայաստանի զարգացման հիմնադրամի գործադիր տնօրեն Արմեն Ավակ Ավակյանը։

Նախնական գնահատմամբ շուրջ 150 միլիոն դոլարի ներդրումով թաղամասի կառուցման ծրագրի մասին հայտարարել է վարչապետ, ՀԶՀ հոգաբարձուների խորհրդի նախագահ Կարեն Կարապետյանը։

«Լավագույն նախագծի» ընտրությունից հետո հաղթող ընկերությունը փետրվարին կներկայացնի թաղամասի մաստեր պլանը, շինարարությունը նախատեսվում է սկսել գարնանը։

Panorama.am-ը անդրադարձել էր այս՝ գյուղը քաղաքում ներկայացնելու «անհավանական» ծրագրին.

100-150 մլն դոլարով Երևանում «Հայկական գյուղ» սարքելու կառավարության ծրագիրը, որ նպատակ ունի զբոսաշրջիկներին ի ցույց  դնելու հայաստանյան գյուղերի համն ու հոտը, մշակույթը, նիստ ու կացը… մղկտացնում է:  Այդ ինչքա՞ն չունենք կենդանի գյուղ ցույց տալու, որ  գյուղի թանգարան ենք բացում մայրաքաղաքում, այն էլ՝ միլիոններով:

Մայրաքաղաքն էլ՝ մայրաքաղա՞ք:  Մի «Հին Երևան» թանգարան էլ մայրաքաղաքի հիշատակին է կառուցվելու, էլի՝ միլիոններով:

Կենդանի կյանքը (տավտալոգիա մի համարեք) գնահատելու, պահպանելու, սիրելու փոխարեն, այն դիակ ենք սարքում՝ հետո դրա մասին թանգարան սարքելու վեհ նպատակներով:

Ինչո՞վ Ֆրանկենշտեյնի մտածելակերպ չէ:

Գյուղը ապրեցրեք, հաստատ գյուղի մարդիկ ցույց տալու բան կունենան: Թե՞ վախենում ենք, որ մշակույթը իսպառ կորել է: Իսկ վախը հիմքեր ունի՝  մենք գյուղական դպրոցների շարք էինք անում ու մտածում՝  այս մարդիկ անգերազանցելի լավատես են ու ամուր, թե՞ ուղղակի համակերպված ձգում են: