Ձեր վստահելի աղբյուրը

ԵՄ-Հայաստան համաձայնագրի ստորագրմանը հաջորդողն աշխատանքն է, և այստեղ ամեն ինչ Հայաստանից է կախված՝ արդյո՞ք կօգտվի ընձեռվող հնարավորություններից, թե ոչ: Նոյեմբերի 28-ին լրագրողների հետ հանդիպմանն այս մասին նշեց «Մարդկային զարգացման միջազգային կենտրոնի» նախագահ, ԱԺ նախկին պատգամավոր  Թևան Պողոսյանը:

Նա ընդգծեց՝ այս համաձայնագիրն իրավական դաշտի ձևավորումն է, որտեղ Հայաստանը և ԵՄ-ն պետք է իրար հետ աշխատեն: Պողոսյանը համաձայնագիրն անվանում է «արդիականացման օրակարգ»՝ բազմաթիվ ոլորտների համար:

«ԵՄ-ն պատրաստ է մեզ հետ քայլեր ձեռնարկել, օգնել՝ ինչպես մասնագիտական, այնպես էլ ֆինանսական հարցերում: Պետք է տեսնենք՝ արդյո՞ք մեզ այստեղ ինչ-որ բան պետք է փոխել: Հաշվի առնելով մեր երկրի իրավիճակը՝ չկա մի ոլորտ, որտեղ մենք բարեփոխումների կարիք չունենք: Հուսանք՝ կստանանք այնպիսի բարեփոխումներ, որոնք ընդունելի են թե ԵՄ կողմից, թե ցանկացած երկրի»,- ասաց նա:

Նախկին պատգամավորը կարևորեց վստահության մթնոլորտի ձևավորումը, որ մեր երկիրը եվրոպացի ներդրողի համար գրավիչ լինի: Հակառակ դեպքում, Պողոսյանի համոզմամբ, ներդրում կանեն միայն «-յան» ազգանուն կրող մարդիկ, ովքեր հենված կլինեն անձնական հարաբերությունների ու վստահության վրա: Նա ընդգծեց, որ արտադրված ցանկացած ապրանք սերտիֆիկացված կլինի, լաբորատոր ստուգում կանցնի, և դրա շնորհիվ այն հնարավոր կլինի արտահանել թե ԵՄ, թե ցանկացած այլ շուկա: Ըստ բանախոսի՝ կարևոր է, թե ՀՀ իշխանությունն ու քաղաքացիները որքանով են պահանջատեր՝ համաձայնագրի ընձեռած հնարավորություններից օգտվելու հարցում:

Հարցին՝ այս պայմանագիրն արդյո՞ք իշխանության ձեռքբերումն է, Պողոսյանը նշեց, որ բանակցողն իրենք են, սակայն սա միայն իշխանության պայմանագիրը չէ, այլ բոլոր քաղաքացիների՝ բոլոր եվրոպացիների հետ կնքած պայմանագիրը:

«Իշխանությունը եկել է, ստորագրել, բայց մյուս գործընթացը մենք ենք անելու: Սա երկրի պայմանագիրն է, մենք պետք է այդպես գնահատենք: «Եվ, և»-ը միշտ տեղի է ունենում գլխում, թղթերի վրա չի լինում: Դու կարող ես հազարավոր պայմանագրեր ստորագրել, որոնք կյանքի չես կոչելու, և այդպես էլ մնալու են պայմանագրեր»,- ասաց նա:

Հնչող մեկնաբանություններին, թե Հայաստանն այս համաձայնագրի ստորագրումով դառնում է ԵՄ և ԵՏՄ միջև խաչմերուկ, Պողոսյանն արձագանքեց, որ Հայաստանը հնարավորության պոտենցիալ դաշտն է դառնում, որտեղ կարող են համագործակցել տնտեսական տարբեր միություններ: Նա ընդգծեց՝ Հայաստանը համարում է եվրոպական երկիր և եվրոպական քաղաքակրթության մաս, և ԵՄ ու ԵՏՄ ցանկությունները հաշվի առնելով՝ պետք է փորձել դառնալ հենց այն հարթակը, որտեղ կհամագործակցեն այդ երկու միությունները, Հայաստանն իր հերթին պետք է փորձի դա օգտագործել գործնականում:

«Հայաստանն այս առումով առաջին անգամ չէ, որ ունիկալ է: Լինելով ՀԱՊԿ-ի անդամ՝ մենք գործընկեր ենք նաև ՆԱՏՕ-ի հետ»,- ասաց նա:

Պողոսյանը համոզմունք հայտնեց՝ այս համաձայնագրի ստորագրումից հետո բարեփոխումների հավատը ձևավորվելու է արդյունքներից, ուստի պետք է աշխատել այդ արդյունքների ձևավորման ուղղությամբ: