«Ելքը» ինչու՞ հարց չի դնում ԱՊՀ-ից, ՀԱՊԿ-ից դուրս գալու. Զուրաբյանը՝ Մարուքյանին
ԱԺ արտաքին հարաբերությունների մշտական հանձնաժողովի նիստի այսօրվա օրակարգում ներառված է Հայաստանի և Արցախի խորհրդարանների համատեղ նիստի մասին որոշումը, «Ելք» խմբակցության հեղինակած «ՀՀ մասով Եվրասիական Տնտեսական Միության պայմանագրի գործողությունը դադարեցնելու գործընթաց սկսելու վերաբերյալ» ԱԺ հայտարարության նախագծի մասին հարցերը։
Նիստը վարող արտաքին հարաբերությունների մշտական հանձնաժողովի նախագահ Արմեն Աշոտյանը նշեց, որ օրերս Հայաստանում էր Արցախի Հանրապետության ԱԺ պատվիրակությունը՝ ԱԺ նախագահի գլխավորությամբ. «Բովանդակային ու բուռն քննարկումների ժամանակ հնչեց առաջարկություն և այդ առաջարկը գալիս է նաև մեր արցախյան գործընկերների կողմից, մինչև տարեվերջ համատեղ նիստ հրավիրել, որովհետև միջազգային հարաբերությունների անցուդարձը, արտաքին հարաբերությունների օրակարգը երկու հայկական պետության համար համընկնում է և կարևոր է: Այս տեսակետից այդ առաջարկությունն ընդունելի համարելով՝ ներառել ենք օրակարգում, որպեսզի որոշում կայացվի այդ նիստը հրավիրելու մասին։ Առաջարկվում է նիստը հրավիրել դեկտեմբերի 9-ին՝ Ստեփանակերտ քաղաքում՝ Արցախի Հանրապետության ԱԺ-ի շենքում։ Դրական որոշման դեպքում ԱԺ արտաքին հարաբերությունների մշտական հանձնաժողովի նախագահը կդիմի ԱԺ նախագահին՝ սահմանված կարգով»։
Երկրորդ օրակարգային հարցին անդրադառնալով, Աշոտյանն ասաց. «Այս նախագիծը մեկ անգամ ներառվել է հանձնաժողովային նիստերի օրակարգում, սակայն չի քննարկվել, հեղինակները կանոնակարգ-օրենքով խնդրել են հետաձգել քննարկումը մինչև 2 ամիս ժամկետով, ժամկետները լրանում են, և մենք ԱԺ կանոնակարգ-օրենքի համապատասխան, ունենալով նաև «Ելք» խմբակցության համապատասխան դիմումը, վերադարձնելու օրակարգ և քննարկելու, առաջարկը ներառել ենք օրակարգում»։
Հիմնական զեկուցող «Ելք» խմբակցության պատգամավոր Էդմոն Մարուքյանն իր խոսքում նշեց, որ պետք է արձանագրվի, որ ԵԱՏՄ-ին անդամակցության երեք տարում հետընթաց է եղել մի շարք ոլորտներում, չի ամրապնդվել ՀՀ անվտանգությունը, ՀՆԱ-ն, զբաղվածության մակարդակը կրճատվել են, պետական պարտքն աճել է:
«ԵԱՏՄ համաձայնագիրը չի գործում, քաղաքացիների դեպորտացիան ՌԴ-ից սովորական երևույթ է դարձել, դա իրականացվում է առանց դատական իրավունքների և մարդկանց՝ լսված լինելու։ Հունվարի 1-ից ուժի մեջ են մտնելու նոր մաքսատուրքերը, որի հետևանքով 900 անուն ապրանք թանկանալու է: Նրա գնահատմամբ՝ կարագի թանկացումն էլ է կապված ԵԱՏՄ-ի հետ, ավելին, ըստ նրա՝ թռչնամիսը կթանկանա, արտասահմանյան մեքենաների մաքսատուրքը ևս կբարձրանա»։
Նրա խոսքով՝ Հայաստանն ավելի լավ պայմանով էր գործում իր մաքսային պարտավորություններով մինչև ԵԱՏՄ միանալը:
Հիմնական զեկուցողին հարց ուղղեց ԱԺ «Ծառուկյան» խմբակցության պատգամավոր Արարատ Զուրաբյանը, թե ինչու «Ելքը» ինչու հարց չի դնում ԱՊՀ-ից, ՀԱՊԿ-ից դուրս գալու, և ՀՀ իշխանություններին Ասոցացման համաձայնագրի համար նոր բանակցություններ սկսելու։
«Նախագծի հիմնավորումներ բաժնում կա այլընտրանք բաժին, որտեղ ասված է, որ դուրս գալով ԵԱՏՄ-ից՝ Հայաստանը կարող է ավարտին հասցնել տարիներ առաջ սկսած և կիսատ մնացած եվրոպական Ասոցացման համաձայնագիրը: Դա ազատություն է այլ երկրների հետ այլ համաձայնագրեր կնքելու, դա 500 միլիոնանոց շուկա է: Ինչո՞ւ հարց չի դրվում ԱՊՀ-ից և ՀԱՊԿ-ից դուրս գալու՝ ՀՀ-ն այս պահին չունի այլ անվտանգային մարմնին անդամակցելու օրակարգ: «Ելք» դաշինքն ունի նման փնտրտուքների մասին մտորումներ, երբ կունենանք նման այլընտրանք և ՀԱՊԿ-ը մեզ կխանգարի դրանում, այդ ժամանակ այդ հարցը կքննարկվի: Իսկ ԱՊՀ հետ կապված մենք որևէ խնդիր չենք տեսնում Հայաստանի՝ ԱՊՀ անդամակցության մեջ, քանի որ այն դեռևս Հայաստանի ազգային շահերը չի ոտնահարում»,- պատասխանեց Մարուքյանը։
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
