Ձեր վստահելի աղբյուրը

Արաբական Միացյալ Էմիրությունները դեկտեմբերի 2-ին տոնում է իր հիմնադրման 46-ամյակը: Ազգային տոնի կապակցությամբ Հայաստանում ԱՄԷ դեսպանությունը  ընդունելություն էր կազմակերպել, որին մասնակցում էին բարձրաստիճան պաշտոնյաներ, դիվանագիտական, հասարակական և այլ կառույցների ներկայացուցիչներ:

ՀՀ-ում Արաբական Միացյալ Էմիրությունների արտակարգ և լիազոր դեսպան Ջասսիմ Մուհամմադ ալ Կասսեմին փաստեց, որ Հայաստանի և ԱՄԷ միջև երկկողմ բարձր հարաբերություններ են հաստատված, դրանք հիմնված են փոխադարձ հարգանքի ու համագործակցության սկզբունքների վրա: Այդ համագործակցությունն, ըստ դեսպանի, անցյալ տարի հասան ռազմավարական գործընկերության մակարդակի:

«ՀՀ նախագահի կատարած վերջին այցը ԱՄԷ, Աբու Դաբիի թագաժառանգի սպասվելիք այցը Հայաստան, ԱՄԷ արտաքին գործերի և միջազգային համագործակցության նախարարի այցը Երևան, ինչպես նաև Հայաստանի և Էմիրությունների նախարարների փոխայցերը վկայում են առկա հարաբերությունները ավելի բարձր մակարդակի հասցնելու երկուստեք ցանկության մասին»,-նշեց նա:

Դեսպանն ընդգծեց՝ տնտեսական, մշակութային հարաբերություններում նկատվում են շարունակական զարգացման և աճի միտումներ, ինչի վառ ապացույցն է երկու երկրների միջև առևտրաշրջանառության աճը:

2016 թ. առաջին ինն ամիսներում առևտրաշրջանառության 71 մլն դոլարի փոխարեն 2017 թվականին նույն ժամանակահատվածում այդ ցուցանիշը հասել է մոտ 140 մլն դոլարի: Դեսպանի խոսքով՝ երկու բարեկամ երկրների միջև տնտեսական հարաբերությունների զարգացումը և Հայաստանում էմիրաթական ներդրումների աճը փաստում են Հայաստանի տնտեսության նկատմամբ Էմիրությունների բիզնես ոլորտի վստահության մասին, դրան նպաստել են նաև մեր հայ գործընկերների հետևողական ջանքերը: Նա նշեց, որ ակնկալում են՝ առաջիկայում կգումարվեն հայ-էմիրաթական համատեղ համաժողովի հանդիպումներ:

ԱՄԷ ազգային տոնի առթիվ շնորհավորեց ՀՀ նախագահի աշխատակազմի ղեկավար Արմեն Գևորգյանը: Նա նշեց, որ համամիտ է դեսպանի հնչեցրած մտքերին, միայն հավելեց, որ անցնող տարին իրոք բեկումնային էր հայ֊էմիրաթական հարաբերությունների համար։

«Մեր երկու երկրների բարձրագույն ղեկավարության միջև ձևավորված լավագույն բարեկամական հարաբերությունները ավելի նպաստեցին բոլոր ոլորտներում մեր կապերի զարգացմանն ու խորացմանը։  Ես ուզում եմ այսօր վստահեցնել բոլորին, որ մենք նույն ջանասիրությամբ, նույն եռանդով պատրաստակամ ենք շարունակելու այդ աշխատանքները»,- ասաց նա։