Ձեր վստահելի աղբյուրը

«Համաձայնագիրն աննախադեպ է Հայաստանի համար թե իր ընդգրկումով, թե իր իրական հնարավորություններով»: Այսօր հայտարարեց «Հեռանկարային ուսումնասիրություններ և նախաձեռնություններ» կենտրոնի ներկայացուցիչ, քաղաքագետ Տիգրան Թորոսյանը «Հայաստան-ԵՄ. համապարփակ և ընդլայնված գործընկերություն» թեմայով խորհրդարանական լսումների ժամանակ:

Քաղաքագետն այն չափազանց կարևորեց նաև հետխորհրդային տրանսֆորմացիայի շրջանակում, ասաց, որ անցած քառորդ դարի ընթացքում մոտ երկու տասնյակ երկրներում սա միակ դեպքն է, երբ ինտեգրում է տեղի ունենում միաժամանակ երկու ուղղություններով:

«Սա իհարկե տալիս է շատ լայն հնարավորություններ, բայց միաժամանակ առաջադրում է չափազանց լուրջ մարտահրավերներ: Ներկայիս խիստ լարված աշխարհաքաղաքական մրցակցությունը, մեկ ուղղությամբ կատարվող քայլերի նախագծման ու իրականացման ընթացքում մյուս ուղղությամբ ձևավորվող սահմանափակումների հաղթահարումը և այլն: Մարտահրավերները բազմաթիվ են»,-իր ելույթում ասաց Տ. Թորոսյանը:

Քաղաքագետը նշեց, որ այդ առումով համաձայնագիրը կարող է մնալ որպես լավագույն հնարավորությունների մի փաստաթուղթ, եթե շատ լուրջ քայլեր չարվեն այդ խնդիրներն իրականացնելու համար:

«Սա վերաբերում է ոչ միայն մարտահրավերների հաղթահարմանը, սա թերևս ամենահեշտ խնդիրն է, շատ ավելի բարդ է իրականացնել այն կարևոր նպատակները, որոնք արձանագրված են փաստաթղթում»,-ասաց բանախոսը:

Կենտրոնի ներկայացուցիչը կարևորեց, որ փաստաթուղթն արձանագրում է՝ նպատակների իրագործման հիմքն ընդհանուր արժեքներն են:

«Սա մեր խնդիրներից մեկը՝ արժեհամակարգի վերանայումը դարձնում է ավելի արդիական: Մյուս կողմից փաստաթղթում ընդգծվում է, որ հիմքերից մեկը ընդհանուր հետաքրքրություններն են: Հայաստանում պետք է մեծ ջանքներ գործադրվեն, որպեսզի մեր հետաքրքրություններն ու շահերն ամբողջությամբ դառնան ԵՄ հետաքրքրությունների ու շահերի շրջանակում գտնվող խնդիրներ: Այս փաստաթուղթը վերաբերում է ոչ միայն ինտեգրմանը, այլև մեր ներքին կյանքին, հատկապես քաղաքական կյանքին»,-ասաց նա:

Թորոսյանը հիշեցրեց, որ ժողովրդավարությունը միայն փաստաթղթերի առկայությունը չէ, ճիշտ հակառակը, կայացած ժողովրդավարությունը ենթադրում է երեք ուղղությամբ լուրջ ձեռքբերումներ՝ օրենսդրական, արժեքային և վարքային:

«Բոլոր երեք ուղղություններով մենք չափազանց մեծ աշխատանք ունենք անելու, որպեսզի այդ ամենը դառնա մեր հասարակության ճնշող մեծամասնության մոտեցում»,-ասաց նա:

Նա մատնանշեց հայաստանյան հիմնախնդիրները՝ քաղաքական համակարգի առանցքային արդիականացում, ինչը նշանակում է բազմակուսակցական համակարգի կայացում, մյուս հիմնախնդիրը կրթության ու գիտության արմատական բարեփոխումն է: Նրա խոսքով, երկուսն էլ  համակարգաստեղծ նշանակություն ունեն:

Թորոսյանը կարևորեց նաև փաստաթղթում ԼՂ խնդրի հետ կապված ձևակերպումը. «Սկզբունքներն իհարկե հայտնի են, բայց կարևոր է ԵՄ հանձնառությունը խնդիրն այդ սկզբունքների շրջանակում լուծելու համար»: