Ձեր վստահելի աղբյուրը

Հայաստանում գրիպի և սուր շնչառական վիրուսային վարակների մասով համաճարակային իրավիճակը սեզոնին համապատասխան է։ Այս մասին Panorama.am-ի թղթակցի հետ զրույցում ասաց ՀՀ Առողջապահության նախարարության աշխատակազմի վտանգավոր և օդակաթիլային վարակների համաճարակաբանության բաժնի պետ Լիանա Թորոսյանը:

«Հանրապետությունում իրականացվող մշտադիտարկման տվյալներով  դիտվում է սուր շնչառական վարակների և գրիպի բնականոն, օրինաչափ ընթացք»,- նշեց բաժնի պետը:
Ըստ Լիանա Թորոսյանի՝  հանրապետությունում շրջանառվում է գրիպի Բ տեսակը:  Լաբորատոր հետազոտությունների արդյունքում, նախորդ շաբաթ գրանցվել է գրիպի հաստատված երկու դեպք, այս շաբաթ՝ մեկ դեպք:

Ընդհանուր առմամբ, շաբաթվա կտրվածքով հանրապետությունում արձանագրվում է 2500 սուր շնչառական վարակի դեպք՝  նախորդ տարվա նույն ժամանակահատվածի   3500-4000 դեպքի դիմաց: «Այսինքն՝ այս տվյալները վկայում են, որ արձանագրված դեպքերը բավականին ցածր են նախորդ տարվա նույն ժամանակահատվածի համեմատ»,- ընդգծեց նա:

Ինչ վերաբերում է այլ շնչառական վարակներին, ապա, ըստ Լիանա Թորոսյանի, լաբորատոր հետազոտությունների արդյունքներում նաև արձանագրվել են այլ շնչառական վարակների հարուցիչներ ՝ ռինովիրուսներ, պարագրիպ և այլն: «Սակայն այս պահի դրությամբ, վերակենդանացման բաժանմունքներում, հետգրիպային բարդություններով հիվանդներ չեն բուժվում: Ստացիոնար հաստատություններում, մասնավորապես, կան 0-3 տարեկան երեխաներ, սակայն նրանց մոտ  բարդություններ չկան»,- ասաց նա: 

Լիանա Թորոսյանը հայտնեց, որ սեզոնային գրիպի և ՍՇ վարակների սեզոնը սովորաբար սկսվում է հոկտեմբերին, իսկ երկրորդ փուլը՝ հաջորդ տարվա սկզբին և շարունակվում մինչև ապրիլի վերջ:

«Շնչառական վարակների հիվանդացության  առաջին պիկն արդեն հաղթահարված է, հիմա դեպքերի նվազում է նկատվում: Երկրորդ պիկն,  ըստ մեր վերլուծությունների, ունենալու ենք փետրվարին, որն ավելի շատ բնորոշվում է ծանրությամբ: Այս պահի դրությամբ կանխատեսումներն այսպիսին են, իսկ թե մեկ շաբաթ հետո ինչ իրավիճակ կլինի՝ հարուցիչը կփոխվի, գործ կունենանք գրիպի Ա տեսակի H1N1 պանդեմիկ ենթատեսակի հետ, թե ոչ, դա արդեն հիվանդացության զարգացման միտումները ցույց կտան»,- ասաց Լիանա Թորոսյանը:

Մասնագետը ևս մեկ անգամ հորդորում է բնակչությանը՝ գրիպից և դրա բարդություններից խուսափելու նպատակով՝   խուսափել գրիպանման երևույթներով հիվանդների հետ շփումից,  իսկ հիվանդներն էլ պետք է մնան  տանը, անպայման դիմեն բժշկի, մասնավորապես՝  տեղամասային թերապևտին կամ ընտանեկան բժշկին և  գրիպի ցանկացած դրսևորման դեպքում ինքնաբուժությամբ չզբաղվել: Նա նաև խորհուրդ է տալիս այս ժամանակահատվածում հագնվել եղանակին համահունչ, պահպանել հազի և փռշտալու վարվելակարգը, օգտագործել շատ հեղուկներ, հաճախակի օդափոխել փակ տարածքները: