Ձեր վստահելի աղբյուրը

Ստրկությունն անցյալի երևույթ չէ։ Աշխատանքի միջազգային կազմակերպության տվյալներով այսօր աշխարհում ստրկության 40 միլիոն զոհ կա։ Ստրկության ժամանակակից ձևերից են մարդկանց առևտուրը, սեռական շահագործումը, անչափահասների աշխատանքային շահագործումը, պարտադրանքով ամուսնությունները, կանանց վաճառքը և երեխաների բռնի հավաքագրումը՝ զինված հակամարտություններում օգտագործելու նպատակով։ Այս մասին գրում է «un.org»-ը։

Հատկանշական է, որ աշխարհում տասը երեխաներից մեկը ստիպված է աշխատել, ինչն ընդհանուր առմամբ կազմում է 150 միլիոն երեխա՝ ներգրավված մանկական ապօրինի աշխատանքում։

Փաստեր և թվեր.

Շուրջ 40,3 միլիոն մարդ ստրկության ժամանակակից ձևերի զոհ է, այդ թվում՝ 24.9 միլիոնը ներգրաված է ստիպողական աշխատանքի, 15.4 միլիոնը՝ պարտադրված ամուսնությունների մեջ։
Աշխարհում 1000 մարդուց 5-ը ժամանակակից ստրկավաճառների զոհն է։Չորս զոհերից մեկը երեխա է։

Ստիպողական աշխատանքի 24.9 միլիոն զոհերից 16 միլիոնը գտնվում են մասնավոր հատվածում, 4.8 միլիոնը սեռական շահագործման զոհ է, իսկ ահա 4 միլիոնը շահագործվում է պետական  իշխանությունների կողմից։

Կանայք և աղջիկները կազմում են առևտրային սեքս-ինդուստրիայի 99 տոկոսը։