Ձեր վստահելի աղբյուրը

ԵԱՀԿ-ի Ժողովրդավարական հաստատությունների և  մարդու իրավունքների գրասենյակի (ԺՀՄԻԳ) դիտորդական առաքելության թիմը նոյեմբերի 29-ից դեկտեմբերի 1-ն այցով եղել է Երևանում՝  ներկայացնելով  ապրիլի 2-ին կայացած խորհրդարանական ընտրությունների վերաբերյալ ԵԱՀԿ / ԺՀՄԻԳ դիտորդական առաքելության վերջնական զեկույցը:

ԵԱՀկ պաշտոնական էջի փոխանցմամբ, զեկույցում ներկայացված եզրակացություններն ու առաջարկություններն ուսումնասիրվել են Ազգային ժողովի, Կենտրոնական ընտրական հանձնաժողովի, քաղաքական կուսակցությունների, պետական մարմինների, քաղաքացիական հասարակության և միջազգային հանրության ներկայացուցիչների հետ հանդիպումների ու քննարկումների ժամանակ:

ԺՀՄԻԳ-ի խումբը ներկայացրել է հետագա համագործակցության համար հնարավոր ոլորտները և  շահագրգիռ մարմինների համար առաջարկել հստակ քայլեր՝ առաջարկություններ ներկայացնելու համար:

Ընտրական գործընթացների նկատմամբ հասարակության վստահության ամրապնդման նպատակով ԺՀՄԻԳ-ի թիմը ուշադրություն է հրավիրել ձայներիի գնման և պետական ռեսուրսների չարաշահման խնդիրների լուծման առաջարկությունների վրա:

Զեկույցը, ի թիվս այլ բաների, առաջարկում է ընդգրկուն ընտրական բարեփոխումներ իրականացնել օրենքի մնացած բացթողումներն ու  երկիմաստ դրույթների խնդիրը լուծելու համար, որոնք վերաբերում են քարոզչությանը, քարոզչության ֆինանսավորմանը, բողոքարկման իրավունքին ու ժամկետներին:

ԺՀՄԻԳ-ը նշել է, որ հետագայում անհրաժեշտ են  ջանքեր գործադրվեն՝  հաշմանդամություն ունեցող անձանց ընտրական իրավունքի սահմանափակումների վերացման և քվեարկության հասանելիության բարձրացման համար, ինչպես նաև ընտրական գործընթացներում կանանց մասնակցության ընդլայնման ու ընտրական վարչարարության արդյունավետության բարձրացման համար:

Գրասենյակը  կոչ է արել իշխանությանը ցուցաբերել քաղաքական կամք ընտրողների նկատմամբ կիրառվող բոլոր տեսակի ճնշումների, խոչընդոտների  դեմ եւ հրապարակայնորեն հանդես գալ ձայների առք ու  վաճառքի դեմ:

ԺՀՄԻԳ Ընտրությունների բաժնի ղեկավար Ալեքսանդր Շլուկը հայտարարել է, որ գրասենյակը պատրաստակամ է աջակցել ներկայացված առաջարկությունների իրականացմանը: