Ձեր վստահելի աղբյուրը

Երևանում մեքենաների թվի ավելացման հետևանքով  քաղաքը դժվարամատչելի է դարձել հետիոտն, հեծանվորդ, հաշմանդամության սայլակով տեղաշարժվող քաղաքացիների համար:

Երևանի բնակիչ Արտակ Գաբոյանը հեծանվորդ է: Նա ամիսը մի քանի անգամ զանգահարում է ՃՈ թեժ գիծ՝ դժգոհելով, որ Չարենցի 1 հասցեում գտնվող հետիոտնային անցման վրա մշտապես  մեքենաներ են կայանած: Դրա հետևանքով քաղաքացիները չեն կարողանում փողոցը հատել սահմանված վայրով, բացի այդ տեսադաշտը փակ է:

Նա ավելի վաղ ՃՈ-ին առաջարկել է խնդիրը լուծելու համար հետիոտնի մոտ տեսախցիկ տեղադրել: Պատասխանել են՝ նպատակահարմար չէ:

Թեժ գծի զանգերին պատասխանող ՃՈ ներկայացուցիչներն ամեն զանգից հետո խոստանում են մեքենաները հեռացնել հետիոտնային անցումի վրայից, բայց մի քանի ժամ շարունակ մեքենաները մնում են նույն տեղում:

ՃՈ ներկայացուցիչը մի պարագայում արդարանում է, որ դրսից հյուր ունեն, ուղեկցումով են զբաղված, մեկ  այլ դեպքում՝ կարգախումբը եկել է, վարորդին փնտրել ու չի գտել, մի դեպքում էլ վարկած է առաջ քաշում, կարող  է  հանել է, էլի եկել  կանգնել է:

Այս վիճակը միայն այդ մեկ հասցեում չէ, գրեթե ողջ քաղաքում նույն պատկերն է, Ամանորին ընդառաջ վիճակն էլ ավելի կվատանա:

Հասարակական տրանսպորտից օգտվող քաղաքացիներն էլ նույն գլխացավանքի մեջ են ընկնում կանգառներում սպասելիս: Կանգառում կայանած մեքենաների պատճառով նրանք ստիպված են կանգնել փողոցի գրեթե մեջտեղում:  Կանգառասրահից տրանսպորտին հասնելու համար պետք է շատ նիհար ու ճկուն լինել, պոչ պոչի կանգնած մեքենաների մեջտեղով անցնել կարողանալ:  Իսկ հասարակական տրանսպորտն էլ ստիպված է կանգնել կամ երկրորդ գծում կամ էլ էլի հետիոտնային անցումի վրա:

Քաղաքացին խմբագրությանն է տրամադրել տարվա ընթացքում օրվա տարբեր ժամերին  արված լուսանկարներ:

Սա այն պարագայում, երբ հետիոտնի անցումից մոտ 50 մ այն կողմ ՃՈ մեքենան հերթապահություն է իրականացնում: