Ձեր վստահելի աղբյուրը

Վրաստանի նախկին նախագահ, Ուկրաինայի Օդեսա նահանգի նախկին ղեկավար, «Նոր ուժերի շարժման»  ղեկավար Միխեիլ Սաակշվիլու բնակարանում խուզարկություն է իրականացվում:

«Ուկրաինական պրավդա»-ի  փոխանցմամբ, այդ ընթացքում որևէ մեկին չի հաջողվել կապ հաստատել Սաակշվիլու հետ: Նրա մամուլի քարտուղար Մարյանա Պոչտարն ասել է, որ նա հեռախոսազանգերին չի պատասխանում: Սաակաշվիլիի կողմնակից Դավիդ Սակվարելիձեն հայտարարել է, որ նա խուզարկության ժամանակ տանիքում է եղել:

Աղբյուրի հաղորդմամբ, Սաակշվիլու գործով զբաղված է երկրի գլխավոր դատախազությունը: Խուզարկությունն իրականացնում է «Ալֆա» հատուկ ստորաբաժանումը:

Ուկրաինական մեկ այլ աղբյուրի հաղորդմամբ, Սաակաշվիլիի փաստաբանը հայտարարել է, որ քաղաքական գործչի տան դռները կոտրել են:

«Մենք եղանք այնտեղ: Առայժմ մենք չգիտենք, թե դա ով է արել»-ասել է նա:

Փաստաբանը չի բացառել, որ Սաակշվիլիին կարող են արտաքսել, ձերբակալել կամ էլ կալանավորել:

«Բայց ուզում եմ հիշեցնել, որ այդ բոլոր գործողությունները կլինեն անօրինական: Օրենսդրության համաձայն,  արտաքսումն ու էքստրադիցիան չեն կարող կիրառվել, քանի որ մենք այժմ բողոքարկում ենք Միխեիլ Սաակշվիլու կարգավիճակի վերաբերյալ Միգրացիոն պետական ծառայության գործողությունը: Նա հիմա լրացուցիչ պաշտպանության կարիք ունի: Միջազգային օրենսդրությամբ, Մարդու իրավունքների ու ազատությունների պաշտպանության մասին Կոնվենցիայով արգելվում է նման անձի արտաքսումը»,-ասել է Ռուսլան Չեռնոլուցկին: