Ձեր վստահելի աղբյուրը

Արաբկիր և Քանաքեռ Զեյթուն ընդհանուր իրավասության դատարանի դատավոր Արթուր Ստեփանյանը բավարարել է Էրոս Ռամազոտիի՝ չեղարկված համերգի տոմսերի գումարը վերադարձնելու պահանջով դատարան դիմաց քաղաքացիների հայցը:

Հայցվոր կողմին ներկայացնող Գայանե Դեմիրչյանը Panorama.am-ի հետ զրույցում  մանրամասնեց, որ հայցը  ներկայացվել էր նախորդ տարվա հունիսի 24-ին  66 դիմողի անունից:

«Պահանջի չափը` 2.363.000 ՀՀ դրամ  էր, ինչպես նաև  դրան հաշվեգրվող տոկոսներ։ Հայցն ամբողջությամբ բավարարվել է»,-ասաց նա:

Հիշեցնենք, որ պատասխանողներն էին Զարինե Մխեյանը, «Ֆորպոստարտ» ՍՊԸ֊ն, «Շոուսթար» ՍՊԸ-ն:

Այս պահին դատարանի վճիռը դեռ օրինական ուժի մեջ չի մտել: Այն հրապարակվելուց հետո՝ մեկ ամսվա ընթացքում հնարավոր է բողոքարկել:

Հիշեցնենք, որ միջազգային մեգա-աստղ Էրոս Ռամազոտիի  մենահամերգը Երևանում նախատեսված էր 2016 թ.ապրիլի 26-ին: Համերգը չկայացավ: Մինչ այս պահը տոմս գնած քաղաքացիներից շատերին չեն վերադարձվել տոմսերի գումարները: Նախապես հայտարարվել էր, որ տոմսերի գումարի վերադարձը սկսելու է 2016-ի մայիսի 26-ից: Հետո ժամկետը հետաձգվեց:

Դիմումատուները դատարանից պահանջում են պատասխանողներից հօգուտ հայցվորների բռնագանձել ավելի քան 2 մլն դրամ՝  որպես պայմանգրային պարտավորությունների չկատարման արդյունքում պատճառված վնաս: