Ձեր վստահելի աղբյուրը

«Կառավարության կողմից Ազգային ժողով ներկայացված «ՀՀ 2018 թվականի պետական բյուջեի մասին» օրենքի նախագիծը ոչ միայն տնտեսական, այլև քաղաքական փաստաթուղթ է և դրա շուրջ ծավալվող դժվարին ու պատասխանատու քննարկումները, որոնք վերաբերում են մեր երկրի զարգացման հեռանկարին, բնականաբար, տնտեսականից ու սոցիալականից բացի, նաև քաղաքական են»,- այսօր խորհրդարանում բյուջեի նախագծի վերջնական քննարկման ժամանակ նշեց ՀՀ ԱԺ նախագահ Արա Բաբոլյանը։

Նա շնորհակալություն հայտնեց  բոլոր քաղաքական ուժերի ներկայացուցիչներին` շահագրգիռ քննարկման ու ակտիվ դիրքորոշումների համար, ինչպես նաև վարչապետի գլխավորությամբ կառավարության ներկայացուցիչներին՝ խորհրդարանի հետ արդյունավետ համագործակցության և ներդաշնակ աշխատանքի համար:

«Երկրի հերթական բյուջեի հերթական քննարկումը ևս մեկ հնարավորություն ու առիթ է` խոսելու առկա խնդիրների, մարտահրավերների, դրանց հաղթահարման ու լուծումների մասին: Բոլորս էլ գիտակցում ենք, որ դանդաղելու ժամանակ չունենք, ուստի անհրաժեշտ է լինել ավելի հետևողական ու սկզբունքային: Մենք իրավունք չունենք հանգիստ շունչ քաշելու, մխիթարվելով, թե միջազգային ֆինանսական ճգնաժամն այլևս հետևում է, թե մենք զսպեցինք այդ ճգնաժամի հնարավոր բարդ հետևանքները, թե աշխարհաքաղաքական այս կամ այն թնջուկը հանգուցալուծվում է և այլն:

Պետք է ամուր հիմքեր ստեղծենք տնտեսական առաջընթացի, բարեկեցության ու լավատեսության համար»,- ասաց Բաբլոյանը։

Խորհրդարանի ղեկավարի խոսքով՝ երկրի գլխավոր ֆինանսական փաստաթուղթը հստակ ասում է՝ եկեք ինքներս ազնիվ լինենք մեր առջև և ընդունենք, որ այս պահին այսքա'նն է մեր հնարավորությունների սահմանը:

«Այն նաև ասում է, որ մեր ունեցածը պետք է այնպես ծախսել, որ հաջորդ տարիներին կարողանանք ասել՝ մեր ուժերի սահմանները ինքներս ենք մեծացրել: Անկեղծորեն պիտի ասեմ, որ 2018 թվականի բյուջեի նախագիծը ինձ միաժամանակ և ոգևորում է, և անհանգստացնում: Ոգևորում է, քանի որ տեսնում եմ տնտեսական վերելքին միտված հստակ ծրագիր, տեսնում եմ պաշտպանության ոլորտի ամրացման անթաքույց կամք և, վերջապես, տեսնում եմ իրերն իրենց անունով կոչելու և վարդագույն ակնոցներին չապավինելու ձեռագիր: Սրանք ես տեսնում եմ շատ հստակ, և դա ինձ ոգևորում է: Բայց ես տեսնում եմ, որ 2018 թվականի պետական բյուջեի նախագիծը պակաս առատաձեռն է սոցիալական ոլորտի, մասնավորապես կրթության ու առողջապահության հանդեպ: Ու թեև ես շատ լավ հասկանում եմ, որ այն, ինչ հիմա մենք անում ենք, մեծացնելու է վաղվա մեր հնարավորությունները նույն կրթության ու առողջապահության ոլորտներում թռիչք ունենալու համար, միևնույն է, կարծում եմ, որ մենք հետագայում ավելի լրջորեն պետք է աշխատենք` այս ոլորտների ֆինանսավորումն առնվազն չնվազեցնելու, այլ ավելացնելու ուղղությամբ»,- մանրամասնեց Արա Բաբլոյանը։

Նա նշեց, որ 2018 թվականի պետական բյուջեն, բնականաբար, չի կարող իր մեջ տեղավորել բոլոր ցանկությունները:

«Այստեղ է, որ տարակարծություններ, տեսակետների ու դիրքորոշումների բախում են առաջանում քաղաքական ուժերի, պատգամավորների ու կառավարության ներկայացուցիչների միջև: Սակայն հասկանալի է, որ բոլոր հարցերը միանգամից լուծելը, մեղմ ասած, դժվար է, շատ անգամ` անհնար: Հետևաբար, պոպուլիզմը որևէ կերպ ընդունելի չէ, որովհետև այն կարող է հանգեցնել նաև սոցիալական աղետի: Պետք է գնալ իրատեսության, գերակայություններին նախապատվություն տալու ճանապարհով:

Հուսով եմ` մենք կկարողանանք, հեռատեսություն ու սթափություն դրսևորելով, ընդունել պետական բյուջեի առավել օպտիմալ տարբերակ: Դրանով իսկ կառավարությանը հնարավորություն կտանք իրագործել նախատեսված ծրագրերը, հասնել տնտեսության կայուն աճի, որպեսզի խոսքը վերածվի գործի, գործն էլ իր հերթին դառնա արդյունք:

Կոչ եմ անում կողմ քվեարկել «Հայաստանի Հանրապետության 2018 թվականի պետական բյուջեի մասին»  Հայաստանի Հանրապետության օրենքի նախագծին»,- եզրափակեց ԱԺ նախագահը։